საქართველოს მოქალაქეები ევროპის ქვეყნებში უვიზოდ მიმოსვლას მხოლოდ ბიომეტრიული პასპორტით შეძლებენ.  ბიომეტრიული პასპორტი 2010 წლის 15 აპრილიდან გაიცემა. დღეს საქართველოს 995 443 მოქალაქეს აქვს ბიომეტრიული პასპორტი. თუკი თქვენ ჯერ კიდევ არ გაქვთ ბიომეტრიული პასპორტი (პასპორტი მიღებული გაქვთ 2010 წლის 15 აპრილამდე), ძველ პასპორტს გამოიყენებთ მხოლოდ იმ შემთხვევაში, თუ უვიზო რეჟიმის ამოქმედებამდე მიღებული გაქვთ გრძელვადიანი და ჯერ კიდევ მოქმედი ვიზა.

სახელმწიფო სერვისების განვითარების სააგენტოს ინფორმაციით, ჩვეულებრივი პასპორტისგან განსხვავებით, ბიომეტრიულ პასპორტს დამატებული აქვს ელექტრონული მატარებელი, რომელზეც დატანილია პერსონალური მონაცემები, ელექტრონული ფოტოსურათი და თითის ანაბეჭდები.

ბიომეტრიული პასპორტი  მაღალტექნოლოგიური და გაყალბებისგან დაცული სამგზავრო დოკუმენტია, რომლის გამოყენება მიზნად ისახავს პიროვნების სრულყოფილ იდენტიფიკაციას და ოფიციალური დოკუმენტის გაყალბების ფაქტების აღმოფხვრას.

სრულწლოვანი პირისთვის ბიომეტრიული პასპორტის 10 სამუშაო დღეში დამზადება 100 ლარი ღირს, იმავე დღეს მიღება კი – ორჯერ მეტი.

პასპორტის აღებისას შეღავათები რამდენიმე კატეგორიაზე ვრცელდება.

ბიომეტრიული პასპორტის მისაღებად საჭირო დოკუმენტაცია: პირადობის მოწმობა (დედანი), ორი ფერადი ბიომეტრიული ფოტო, პასპორტზე მომსახურების საფასურის გადახდის ქვითარი, პასპორტის შეცვლის შემთხვევაში – ძველი პასპორტი.