პირველი ვიცე-პრემიერი, ფინანსთა მინისტრი დიმიტრი ქუმსიშვილი მსოფლიო ბანკის უფროს ვიცე-პრეზიდენტსა და წამყვან ეკონომისტს, პოლ რომერს შეხვდა. მინისტრი აშშ-ში სამუშაო ვიზიტით იმყოფებოდა. მხარეებმა საქართველოში მსოფლიო ბანკის პროექტების მიმდინარეობა, პრიორიტეტული მიმართულებები და სამომავლო თანამშრომლობის პერსპექტივები განიხილეს.

საუბარი შეეხო საქართველოში არსებულ ეკონომიკურ ტენდენციებსაც. დიმიტრი ქუმსიშვილმა მსოფლიო ბანკის უფროს ვიცე-პრეზიდენტს მთავრობის 4-პუნქტიანი რეფორმების გეგმა და მის ფარგლებში მიმდინარე და დაგეგმილი რეფორმები გააცნო. მან განათლების რეფორმაზე, გადახდისუნარიანობის კანონმდებლობის შემუშავებაზე, საპენსიო სქემისა და კაპიტალის ბაზრის განვითარებაზეც ისაუბრა.

როგორც უწყებაში აცხადებენ, მსოფლიო ბანკის უფროსი ვიცე-პრეზიდენტი პოლ რომერი საქართველოს მთავრობის რეფორმებით დაინტერესდა და გამოთქვა ინიციატივა, რომ პირადად მიიღოს მონაწილეობა მათი შემუშავების პროცესში. დიმიტრი ქუმსიშვილმა მსოფლიო ბანკის უფროსი ვიცე-პრეზიდენტი საქართველოში მოიწვია.

„მსოფლიო ბანკის მისიის წარმომადგენლებმა დადებითად შეაფასეს ის გადაწყვეტილებები, რომლებიც საქართველოს მთავრობამ რეფორმების განხორციელების მიმართულებით მიიღო. შეხვედრაზე აღინიშნა, რომ საქართველო და მსოფლიო ბანკი გააგრძელებენ ნაყოფიერ თანამშრომლობას საქართველოს საინვესტიციო შესაძლებლობებისა და ეკონომიკის კონკურენტუნარიანობის გაზრდის ხელშეწყობის მიმართულებით“,- აცხადებენ უწყებაში.