„ევროპულმა საქართველომ“ და „თავისუფალმა დემოკრატებმა“ საკონსტიტუციო კომისია დატოვეს, - ამის შესახებ ირაკლი აბესაძემ და შალვა შავგულიძემ პარლამენტში გამართულ პრეკონფერენციაზე განაცხადეს.
მათი განმარტებით, ამის მიზეზი ისაა, რომ შემოთავაზებული საკონსტიტუციო ცვლილებების პროექტი არასამართლიან საარჩევნო სისტემასა და პრეზიდენტის ინსტიტუტის უფლებამოსილების შეზღუდვას ითვალისწინებს. მათი შეფასებით, პროექტში გათვალისწინებულია მხოლოდ „ქართული ოცნების" პოზიციები და უგულებელყოფილია ოპოზიციური პოლიტიკური პარტიებისა და არასამთავრობო სექტორის განსხვავებული პოზიციები. შავგულიძისა და ირაკლი აბესაძის ინფორმაციით, „თავისუფალი დემოკრატები" და „ევროპული საქართველო" შაბათს პროექტის კენჭისყრაში მონაწილეობას არ მიიღებენ.
საკონსტიტუციო კომისია რამდენიმე დღის წინ დატოვეს პარტიებმა: „სახელმწიფო ხალხისთვის", „ერთიანი ნაციონალური მოძრაობა", „პატრიოტთა ალიანსი" და „დემოკრატიული მოძრაობა".
