თბილისის მერის, დავით ნარმანიას განცხადებით, გარევაჭრობა დიდუბის ტერიტორიაზე ისევე მოწესრიგდება, როგორც თბილისის სხვა უბნებში. ამის შესახებ ინფორმაციას „ინტერპრესნიუსი“ ავრცელებს. ნარმანია მეტრო დიდუბის მიმდებარედ მოვაჭრეების საპროტესტო აქციას ეხმაურება.
„დიდუბის ტერიტორიაზე გარევაჭრობა ისევე მოწესრიგდება, როგორც სხვა ადგილებში - მეტრო „მარჯანიშვილის” მიმდებარედ და სხვა ტერიტორიებზე. ვაჭრობა, ერთი მხრივ, უნდა იყოს ლეგალიზებული, მეორე მხრივ, დაცული იყოს სურსათის უვნებლობისა და უსაფრთხოებასთან დაკავშირებული წესები, რომელსაც პერიოდულად სოფლის მეურნეობის სამინისტრო ამოწმებს. დიდუბის ტერიტორიაზე ვაჭრობაც აუცილებლად ამ წესებში მოექცევა.
რაც შეეხება ჭიშკრის გახსნას, ეს ორ კომპანიას შორის მიმდინარე დავაა. თბილისის მერია ამ საკითხებში ჩართულია, თუმცა მისი აღსრულება დადგენილი წესით და ნორმით უნდა მოხდეს, ამ საკითხზეც მიმდინარეობს მუშაობა”, - განაცხადა დედაქალაქის მერმა.
მოვაჭრეები მერიასთან გამართულ აქციაზე დიდუბეში ორ ბაზარს შორის არსებული კედლის დემონტაჟს მოითხოვენ. მათი თქმით, დიდუბეში, მეტროს მიმდებარედ ორ ბაზარსა და ორ შპს-ს ერთმანეთში აქვთ დავა და ამით მოვაჭრეები ზარალდებიან.
