ახალციხისა და ასპინძის მუნიციპალიტეტებში ორ მეჩეთს რეაბილიტაციას ჩაუტარებენ. როგორც ძეგლთა დაცვის ეროვნული სააგენტოს ხელმძღვანელმა, ნიკოლოზ ანთიძემ „ლიბერალთან“ საუბარში განაცხადა პროექტზე მუშაობა დაწყებულია და მისი დასრულების შემდეგ დაიწყება მეჩეთების სარეაბილიტაციო სამუშაოები.
„ჩვენ დავიწყეთ უმცირესობასთან დაკავშირებული კულტურული მემკვიდრეობის ძეგლების რეაბილიტაციის პროცესი. 2015 წელს რეაბილიტაცია ჩავუტარეთ ქობულეთის მუნიციპალიტეტში სოფელ კვირიკეს ჯამეს. ახლა დაიწყო მომზადება სოფელ ოთასა და საყუნეთის მეჩეთების რეაბილიტაციის პროექტების. როცა პროექტები მზად იქნება, დაიწყება საერაბილიტაციო სამუშაოები“, - განაცხდა კულტურული მემკვიდრეობის დაცვის ეროვნული სააგენტოს ხელმძღვანელმა.
ნიკოლოზ ანთიძის თქმით, ამ ეტაპზე აღნიშნულ მეჩეთებში არსებული დაზიანებების აღმოფხვრა შესაძლებელია.
„შევარჩიეთ სოფელ საყუნეთისა და ოთის მეჩეთები, რადგან მათი დაზიანებები გამოსწორებას ექვემდებარება. ცოტა ხანში შესაძლოა, უფრო შეუქცევადი პროცესი მიიღოს და ისეთ მდგომარეობაში აღმოჩნდება, როგორშიც ზოგიერთი სხვა მეჩეთია. ამის პარალელურად ვაგრძელებთ იმ მეჩეთების შერჩევას, რომლებიც სერიოზულ ჩარევებს საჭიროებს“ - განაცხადა ნიკოლოზ ანთიძემ.
სამცხე-ჯავახეთში ათეულობით მეჩეთია, რომელიც დღეს, ძირითადად, სამეურნეო დანიშნულების შენობებად გამოიყენება. 2012 წელს 19 მეჩეთს მიენიჭა ძეგლის სტატუსი.