მთავრობამ საჯარო სამსახურში ნახევარ განაკვეთზე მუშაობის, ღამის საათებში, დასვენებისა და უქმე დღეებში, ჯანმრთელობისათვის რისკის შემცველ სამუშაო პირობებში საქმიანობის წესის დამტკიცების თაობაზე დადგენილება მიიღო. დადგენილება მთავრობამ 21 აპრილს მიიღო, საკანონმდებლო მაცნეში კი დღეს გამოქვეყნდა.
დადგენილების თანახმად, საჯარო დაწესებულება ვალდებულია, მინიმუმამდე დაიყვანოს ჯანმრთელობისთვის რისკის შემცველ სამუშაო პირობებში მომუშავე მოხელეთა რაოდენობა. ჯანმრთელობისთვის რისკის შემცველ სამუშაო პირობებზე მოხელის გადაყვანა კი წარმოადგენს უკიდურეს ზომას და როგორც დოკუმენტშია აღნიშნული, აუცილებლობის არსებობის გარეშე დაუშვებელია.
დოკუმენტში გაწერილია ჯანმრთელობისათვის რისკის შემცველ სამუშაო პირობებში მოხელის სამუშაოდ გადაყვანის წესი.
უფრო კონკრეტულად კი, ჯანმრთელობისთვის რისკის შემცველ სამუშაო პირობებში მოხელის გადაყვანა შესაძლებელია დაწესებულების ხელმძღვანელის მიერ მიღებული ინდივიდუალური ადმინისტრაციულ-სამართლებრივი აქტის საფუძველზე. ამასთან, შესაძლებელია მხოლოდ მოხელის წერილობითი თანხმობით.
დადგენილების თანახმად, აღნიშნულ შემთხევაში მოხელეს უნდა მიეცეს სრულყოფილი ინფორმაცია მისი ჯანმრთელობისათვის საფრთხის შემცველი გარემოებებისა და ფაქტორების შესახებ. ასევე დაუშვებელია, მოხელის გადაყვანა ჯანმრთელობისთვის რისკის შემცველ სამუშაო პირობებში სპეციალური მოსამზადებელი კურსის გატარების გარეშე.
როგორც დადგენილებაშია ნათქვამი, შესაძლებელია საჯარო დაწესებულებამ განისაზღვროს ჯანმრთელობისთვის რისკის შემცველ სამუშაო პირობებზე ზედამხედველი/პასუხისმგებელი პირი. მისი უფლებამოსილება კი საჯარო დაწესებულების ხელმძღვანელის ბრძანებით განისაზღვრება.