„კრემლი განსაკუთრებულ აქცენტს გააკეთებს „რბილი ძალის“ ელემენტების გაძლიერებაზე, რათა უზრუნველყოს სახელმწიფო ინსტიტუტების შესუსტება, პრორუსული საზოგადოებრივი და პოლიტიკური ჯგუფების გაძლიერება და მოახდინოს დასავლური საგარეო პოლიტიკური კურსის დისკრედიტაცია,“ - ნათქვამია საქართველოს თავდაცვის სტრატეგიული მიმოხილვის 2017-2020 წლების დოკუმენტიში.
დოკუმენტის თანახმად, რუსეთის ფედერაციის მზარდი მილიტარიზაცია, სამხედრო ძალების მოდერნიზება და რეგიონზე ზეგავლენის განმტკიცების მცდელობა, ზრდის აგრესიის გაგრძელების რისკს, რაც დადასტურდა ყირიმის ანექსიისა და აღმოსავლეთ უკრაინაში განვითარებული მოვლენების დროს.
როგორც დოკუმენტშია ნათქვამი, ცეცხლის შეწყვეტის შესახებ 2008 წლის 12 აგვისტოს შეთანხმების შეუსრულებლობისა და ოკუპირებულ ტერიტორიებზე რუსული სამხედრო ძალების ყოფნის პირობებში, ფართომასშტაბიანი აგრესიის განახლების საფრთხე შენარჩუნდება.
„საქართველოზე ზეგავლენის განმტკიცების მიზნით, რუსეთის ფედერაცია გააგრძელებს ოკუპირებულ ტერიტორიებზე „სამართლებრივი საფუძვლების“ შექმნის მცდელობებს საერთაშორისო სამართლის ნორმების დარღვევით. ამასთან, ნარჩუნდება საოკუპაციო ხაზის მიმდებარე ტერიტორიების მიტაცების, სტრატეგიული ინფრასტრუქტურის დაკავებისა და სხვა ტიპის პროვოკაციების საფრთხე. ოკუპირებულ ტერიტორიებზე შექმნილი არასტაბილურობა ნოყიერ ნიადაგს ქმნის ტერორიზმის, ორგანიზებული დანაშაულისა და ტრეფიკინგისთვის“, - ნათქვამია თავდაცვის სტრატეგიული მიმოხილვაში.
თავდაცვის სტრატეგიული მიმოხილვის დოკუმენტი განსაზღვრავს თავდაცვის სამინისტროსა და შეიარაღებული ძალების სტრუქტურული, ინსტიტუციური და ოპერატიული შესაძლებლობების განვითარების მიმართულებებს; აღწერს არსებულ ვითარებას; მიმოიხილავს საფრთხეებს, გამოწვევებს. დოკუმენტი აყალიბებს რეკომენდაციებს შეიარაღებული ძალების გარდაქმნის მიზნით და განსაზღვრავს შეიარეღებული ძალების სტრუქტურის 2020 წლის მოდელს.
