თავდაცვისა და უშიშროების კომიტეტის თავმჯდომარე, ირაკლი სესიაშვილი, ნაციონალური მოძრაობის წევრებს ცილისწამებაში ადანაშაულებს და პროკურატურისგან სამართლებრივ რეაგირებას მოითხოვს.
დეპუტატის განმარტებით, საქმეში არსებულ ავტომანქანას შვილის უახლოესი მეგობარი მართავდა, შესაბამისად, ბუნებრივია, რომ ამ ავტომობილზე სხვა უამრავ ანაბეჭდთან ერთად მისი შვილის ანაბეჭდიც იყოს, თუმცა დანაშაულთან მის კავშირს კატეგორიულად გამორიცხავს.
„ცილისწამება არის „ნაციონალური მოძრაობის“ პოლიტიკური სტრატეგია, თუმცა ამ შემთხვევაში ისინი შეეხნენ ჩემს ოჯხას, ამიტომ მოვედი დღეს პროკურატურაში და სამართლებრივ რეაგირებას ველი”, - განაცხადა სესიაშვილმა.
„ნაციონალური მოძრაობის“ ინფორმაციით, ირაკლი სესიაშვილის შვილის ანაბეჭდები ორი წლის წინ მომხდარი ქურდობის საქმეში ფიგურირებს. როგორც პარტიაში ამბობენ, ამის შესახებ სესიაშვილის სუს-ში დასაქმების შემდეგ, პირადი ინფორმაციის გადამოწმებისას გახდა ცნობილი. საქმის გამოძიებას კი ძალოვანი უწყების მაღალი თანამდებობის პირები აფარებენ ხელს.
