„ქრონიკა +-ის“ რედაქტორი, ელისო კილაძე საპარლამენტო უმრავლესობის ერთ-ერთი ლიდერის არჩილ თალაკვაძის განცხადებას გამოეხმაურა და აღნიშნა, რომ პროკურატურის დაცვის პროგრამაზე უარს აცხადებს.
„არჩილ თალაკვაძეს ჩემთვის დაცვის სპეციალური პროგრამა მოუთხოვია, ნაცები პროვოკაციებს მოუწყობენ და ხელისუფლებას დაგვაბრალებენო!
განვმარტავ - უარს ვამბობ ხელისუფლების მხრიდან ყველა მსგავს შემოთავაზებაზე. არ მეშინია და არ ვსაჭიროებ არანაირ დაცვას.
დაცვის სპეციალური პროგრამა შესთავაზეთ კორუმპირებულ, მექრთამე სუს-ის უფროსის მოადგილეს - თქვენი ხელისუფლების სახეს იოსებ გოგაშვილს!!!!!“, - წერს ელისო კილაძე Facebook-ის საკუთარ გვერდზე.
როგორც დღეს არჩილ თალაკვაძემ განაცხადა, პროკურატურამ ელისო კილაძე დაცვის პროგრამაში უნდა ჩართოს. ის არ გამორიცხავს კილაძის მიმართ რაიმე პროვოკაციას, რასაც სუს-ისა და სუს-ის უფროსის მოადგილის სოსო გოგაშვილის დისკრედიტაციისთვის გამოიყენებენ.
„მესმის ელისო კილაძის, როგორც დედის წუხილი, მაგრამ ამ ეტაპზე აშკარაა, რომ ის ცდილობს, შვილის საკითხი მთლიანად სუს-ს და გოგაშვილს დაუკავშიროს. ამ ფონზე ჩნდება მაღალი ალბათობა, რომ ეს ფონი ვინმემ გამოიყენოს, „ნაციონალურმა მოძრაობამ“ ან სხვა დესტრუქციულმა ძალებმა დაგეგმონ გარკვეული პროვოკაცია ქალბატონი ელისოს წინააღმდეგ და მერე ეს გამოიყენონ სუს-ის და გოგაშვილის დისკრედიტაციისთვის. ამიტომ ვფიქრობ, პროკურატურამ უნდა განიხილოს ელისო კილაძის დაცვის პროგრამაში ჩართვის საკითხი“, - განაცხადა არჩილ თალაკვაძემ.