ბულგარეთის პრემიერ-მინისტრმა, ბოიკო ბორისოვმა ევროპარლამენტარი მარია გაბრიელი ევროკომისრის თანამდებობაზე წარადგინა.
„მისი პროფესიული უნარი და ევროპარლამენტში მუშაობის ხანგრძლივი გამოცდილება მარწმუნებს, რომ მარია გაბრიელი კომისიის მუშაობაში მნიშვნელოვან და ღირებულ წვლილს შეიტანს" - თქვა პრემიერმა.
Reuters-ის ინფორმაციით, ბოიკო ბორისოვმა გაბრიელის ნომინირების საკითხი ევროკომისიის პრეზიდენტ ჟან-კლოდ იუნკერთან ერთად პარასკევს განიხილა. გაბრიელის კანდიდატურაზე კომისიაში მომდევნო კვირაში იმსჯელებენ.
ევროპარლამენტარი მარია გაბრიელი საქართველოს ვიზალიბერალიზაციის საკითხზე მომხსენებელი იყო. სწორედ ის უწევდა ლობირებას საქართველოსთვის უვზო მიმოსვლის მინიჭების საკითხს ევროპარლამენტში.
საქართველოსთვის უვიზო მიმოსვლის მინიჭების შესახებ გადაწყვეტილება ევროკავშირის ოფიციალურ ჟურნალში 8 მარტს გამოქვეყნდა. 28 მარტიდან საქართველოს მოქალაქეები ევროკავშირის წევრ 22 ქვეყანაში, 4 არაწევრ და შენგენის წევრობის 4 კანდიდატ ქვეყანაში უვიზოდ მოგზაურობენ.
მარია გაბრიელი ევროპარლამენტს საქართველოს ვიზალიბერალიზაციის მხარდაჭერისკენ მოუწოდებს
