„განხილვის გაგრძელება დღეს იყო შეუძლებელი. ჯგუფი იყო საკმაოდ მცირე, 100 კაცამდე, „აუდიტორია 115“ და ასევე იყვნენ კონკრეტული ძალები, რომლებსაც ჰქონდათ ორგანიზებული პროვოკაცია", - ამის შესახებ პარლამენტის თავმჯდომარე ირაკლი კობახიძემ „რადიო პალიტრის" გადაცემა „რეზიუმეში" განაცხადა.

მისი თქმით, მათ გუშინ ჰქონდათ ინფორმაცია „ამ პროვოკაციების თაობაზე" და მისი აღკვეთა რეალურად შეუძლებელი იყო.

„გამომდინარე იქიდან, რომ როდესაც იგეგმება ექსტრემისტული ღონისძიება, უნდა გამოიყენო ხისტი ძალა, სხვაგვარად ასეთი პროვოკაციის აღკვეთა შეუძლებელია. მიუხედავად მცირე რიცხოვნობისა, 100 კაცს შეუძლია მათ შორის 2500 კაციანი ღონისძიების ჩაშლა. ჩვენ მაქსიმალურად ვცდილობთ ვიყოთ რბილი, მათ შორის ექსტრემისტული ძალების მიმართ. თუ ხისტ ძალას არ გამოიყენებ, ასეთ შემთხვევაში 100 კაცს შეუძლია ნებისმიერი ღონისძიების მარტივად ჩაშლა. მიუხედავად იმისა, რომ ჩვენ წინასწარ ვიცოდით, გადავწყვიტეთ არ გამოგვეყენებინა ხისტი ზომა ამ პროვოკაციასთან მიმართებაში", - განაცხადა კობახიძემ. 

რაც შეეხება თბილისში საკონსტიტუციო პროექტის საყოველთაო-სახალხო განხილვას, მისი თქმით, საკონსტიტუციო კომისიის საორგანიზაციო კომისია ხვალ იმსჯელებს, თუ როგორ გაგრძელდება საყოველთაო სახალხო განხილვის პროცესი.

„ამასთან დაკავშირებით გვექნება მსჯელობა. ხვალ გაიმართება საორგანიზაციო კომისიის სხდომა და იქ მივიღებთ გადაწყვეტილებას, თუ როგორ გაგრძელდება საყოველთაო სახალხო განხილვის პროცესი. პროცესი აუცილებლად გაგრძელდება. კონკრეტულად რა შეხვედრები, სად, როგორ, ეს დაიგეგმება ხვალინდელ სხდომაზე", - განაცხადა კობახიძემ.