თბილისის საქალაქო სასამართლოში, სადაც დეკანოზ გიორგი მამალაძის საქმეს განიხილავენ, ბრალდების მხარე პროცესის სრულად დახურვას მოითხოვს. პროკურატურის თქმით, საქმეში არსებული მტკიცებულებები შეიცავს მესამე პირთა პირადი და ინტიმური ცხოვრების დეტალებს, რის შესახებაც მამალაძე ამ ჩანაწერებში საუბრობს. ამიტომ ამ პროცესის ღიად წარმართვა მესამე პირთა პირადი ცხოვრების უფლებას დაარღვევს.
„აუდიო-ვიდეოჩანაწერებში, ისევე, როგორც მისი ტელეფონიდან ამოღებულ ზარებსა და მესოჯებში გიორგი მამალაძე ჩანს სასულიერო პირისთვის აბსოლუტურად მიუღებელი სახით. ასევე, ეს მტკიცებულებები შეიცავს ინტიმურ დეტალებს, რაც ასევე მიუღებელია სასულიერო პირისთვის. როცა ქვეყნის მოსახლეობის უმეტესობა მართლმადიდებელია, ამ ინფორმაციის გაჟღერებამ შეიძლება საზოგადოებრივ წესრიგს შეუქმნას საფრთხე. გასაჯაროვდება ისეთი დეტალები, რომელიც სასულიერო პირის ზნეობრივ ნორმებს ეწინააღმდეგება" - ამბობს ბრალდების მხარე.
პროკურორის თქმით, მხარეებსა და მოწმეებს ღიად უნდა შეეძლოთ საუბარი ყველაფერზე, ამიტომ არ უნდა იყოს ღია პროცესი.
„აქ ძალიან ბევრი ჟურნალისტია და ვერ ავუკრძალავთ მათ ინფორმაციის გავრცელებას" - ამბობს პროკურორი.
მისივე განმარტებით, პროცესის ღიად განხილვა და პროკურატურის ვერსიებზე საუბარი ხელს შეუშლის გამოძიების ინტერესებს.
„შესაძლებელია იმ პირთა ვინაობის დადგენა, ვისგანაც შეიძლება, რომ ციანიდი შეეძინა. ამიტომ ღიაობა აქაც ხელს შეუშლის გამოძიებას" - ამბობს პროკურატურა.
