ყოფილი მთავარი პროკურორის, ოთარ ფარცხალაძის ადვოკატი მერაბ ჩიქოვანი აცხადებს, რომ აუდიტის სამსახურს კანონით გათვალისწინებული უფლება არ აქვს, გამოაქვეყნოს შუალედური დასკვნა. მისი განმარტებით, აუდიტის სამსახური უფლებამოსილია, გამოაქვეყნოს მხოლოდ შემაჯამებელი დასკვნა.
როგორც ფარცხალაძის ადვოკატმა, მერაბ ჩიქოვანმა დღეს პრესკონფერენციაზე განაცხადა, გენერალურმა აუდიტორმა პირადი მიზნებისთვის გამოიყენა სამსახურებრივი უფლებამოსილების შესრულებისას მოპოვებული ინფორმაცია, რაც ასევე „აუდიტორის ეთიკის კოდექსის“ დარღვევაა.
„გენერალური აუდიტორისა და მისი მოადგილის გუშინდელი განცხადება საზოგადოების შეცდომაში შეყვანის მცდელობაა. ამ დასკვნაში არაფერია ნათქვამი 2013-2014 წლებზე, როდესაც ამ კომპანიამ კომპენსაციის მოთხოვნა დაიწყო. მათი განცხადება ემსახურება იმ მიზანს, რომ რამენაირად გაამართლოს თავისი ნათქვამი, თითქოს თავდასხმა მოხდა კონკრეტული შემოწმებისა თუ დასკვნის გამო”, - განაცხადა მერაბ ჩიქოვანმა.
გუშინ სახელმწიფო აუდიტის სამსახურმა 2017 წლის 17 მაისის მდგომარეობით, ქალაქ თბილისის მუნიციპალიტეტის საკუთრებაში არსებული ქონების მართვისა და განკარგვის შესაბამისობის აუდიტის ფარგლებში მოპოვებულ მტკიცებულებებზე დაყრდნობით არსებული შუალედური ინფორმაცია გამოაქვეყნა.
