„პირდაპირ ვეუბნები ირაკლი შოთაძეს, რომ მას ეს დანაშაული, რომელიც ჩაიდინა და ვიდეოჩანაწერებით მანიპულირება დაიწყო, არ შერჩება. აუცილებლად იქნება გამოძიებული, როდის დაიბარეს ეს ადამიანები, ამ კლუბის თანამშრომლები, რა ზეწოლა განხორციელდა მათზე და ყველა აგებს პასუხს დანაშაულისთვის”, - განაცხადა გენერალურმა აუდიტორმა ლაშა თორდიამ სოციალურ ქსელში გავრცელებული კადრების შეფასებისას, რომელიც 2016 წელს ერთ-ერთ ბარში მომხდარ ინციდენტს ასახავს.
თორდიას განცხადებით, აღნიშნული ვიდეოს ახლა გავრცელება ყოფილ მთავარ პროკურორ ოთარ ფარცხალაძესთან მისი დაპირისპირების საქმეს უკავშირდება. თორდიას თქმით, აღნიშნული ვიდეო უშუალოდ მთავარი პროკურორის, ირაკლი შოთაძის მობილურ ტელეფონში ინახებოდა და ზეწოლის შედეგად ერთ-ერთ მოქალაქეს გაავრცელებინა.
გენერალური აუდიტორის თქმით, ინციდენტი დიდი ხნის წინ მოხდა და აქამდე მასზე არავის უსაუბრია.
„ამდენი ხანია, ეს ფაქტი მომხდარია და ამაზე არავის უსაუბრია, ახლა კი მაინცდამაინც, როცა ოთარ ფარცხალაძე დამესხა თავს „ელ ცენტროში“, გავრცელდა ეს კადრები”, - განაცხადა თორდიამ.
