BBC-ის ცნობით, პაპმა ფრანცისკმა აშშ-ის პრეზიდენტ დონალდ ტრამპს კლიმატის ცვლილებებზე თავისი ხელით დაწერილი 192-გვერდიანი წერილი აჩუქა. მასში დეტალურადაა აღწერილი, თუ რატომ უნდა ებრძოლოს პრობლემებს კლიმატის ცვლილებების შესახებ.
პაპი კლიმატური ცვლილებების საკითხს ჯერ კიდევ 2015 წელს, პარიზის შეთანხმების გაფორმებამდე რამდენიმე თვით ადრე, განიხილავდა.
პარიზის შეთანხმება ექსპრეზიდენტ ბარაკ ობამას ერთ-ერთ მთავარ მიღწევად მიიჩნევა.
პაპის წერილში სახელწოდებით: „LaudatoSi“ აღნიშნულია, რომ თითოეული მოქალაქე ვალდებულია, იზრუნოს დედამიწაზე, რადგან კლიმატური ცვლილებები განაპირობებს გარემოს, სოციალურ, ეკონომიკურ, პოლიტიკურ საფრთხეებს.
ფრანცისკი ტრანსნაციონალური კომპანიების პასუხისმგებლობასაც უსვამს ხაზს. მისი სიტყვებით: „კომპანიები, რომლებიც ნაკლებად განვითარებულ ქვეყნებში ხსნიან ფაბრიკა-ქარხნებს და იქ თავს უფლებას აძლევენ, აკეთონ ის, რასაც ვერასდროს გაბედავენ თავიანთ სამშობლოში და გარემოს დაცვის სტანდარტების მთელი რიგი დარღვევებით ზრდიან საკუთარი ბიზნესის კაპიტალს, ვერ ხვდებიან, რომ ამ ქმედებით ზარალს აყენებენ არა მხოლოდ იმ ერთ ე. წ. მესამე კატეგორიის ქვეყანას, არამედ მთელ პლანეტას.“
როგორც ცნობილია, აშშ-ის ამჟამინდელი პრეზიდენტი დონალდ ტრამპი კლიმატური ცვლილებების პრობლემას მეცნიერების მიერ გამოგონილ სიცრუესა და ჩინელების „ბლეფს“ უწოდებს. მეტიც, ფედერალურ ბიუჯეტში ტრამპი შტატების გარემოს დაცვის სააგენტოს დეპარტამენტის ფინანსების შეკვეცასაც კი გეგმავს.
ამას გარდა, ამ დრომდე უცნობია, დარჩება თუ არა აშშ პარიზის შეთანხმების ხელმომწერთა შორის. ვატიკანი აღნიშნულ საკითხსაც შეეხო და მოუწოდა ტრამპს, არ დატოვოს პარიზის ხელშეკრულების ხელმომწერთა რიგები.
