7 წლის და ზევით ასაკის აუტიზმის მქონე ბავშვებისთვის სეანსების რაოდენობა არ შემცირდება. თბილისის მერიის „აუტიზმის სპექტრის დარღვევის მქონე ბავშვთა რეაბილიტაციის“ ქვეპროგრამის განხორციელების წესში შესული ცვლილების მიხედვით, პროვაიდერი კლინიკები ბავშვებს სერვისს 21 ლარის ნაცვლად 20 ლარად გაუწევენ, რაც ნიშნავს, რომ 600 ბავშვის ნაცვლად 700 ბავშვი მიიღებს მომსახურებას. ასევე ცვლილება შევიდა რეგისტრაციის ჩანაწერში, რეგისტრაციის ვადად 2015 წლის 1 ივლისი გაუქმდება და ბავშვები, ვინც თბილისში დარეგისტრირდებიან 1 წლის შემდეგ მომსახურების მომლოდინეთა რიგში ჩაჯდებიან.
თავდაპირველი ვარიანტით, თბილისის მერიის მიერ საკრებულოსთვის გაგზავნილ ცვლილების დოკუმენტში 7 წლის და ზევით ასაკის ბავშვებისთვის სეანსების რაოდენობა მცირდებოდა, თუმცა მშობლებმა და საკითხზე მომუშავე ექსპერტებმა ამის წინააღმდეგ რამდენიმე აქცია ჩაატარეს და მერიას მოუწოდეს, დადგენილებაში აღნიშნული ცვლილება არ შესულიყო.
