ქუთაისში პედაგოგებმა და მოსწავლეების მშობლებმა მუსტაფა ემრე ჩაბუქის პატიმრობა გააპროტესტეს

05 ივნისი, 2017 21:00

ქუთაისში, დემირელის სახელობის კერძო კოლეჯის პედაგოგებმა და მოსწავლეების მშობლებმა მუსტაფა ემრე ჩაბუქის პატიმრობა გააპროტესტეს. ქუთაისის დემოკრატიული ჩართულობის ცენტრში გამართულ ბრიფინგს სკოლის პედაგოგებისა და მშობლების გარდა, საია-სა და „საერთაშორისო გამჭვირვალობა-საქართველოს“ ქუთაისის ოფისის ხელმძღვანელებიც ესწრებოდნენ.

დემირელის სახელობის კერძო კოლეჯის პედაგოგი ნოდარ ჭუმბურიძე აცხადებს, რომ მუსტაფა ჩაბუქი 20 წლის განმავლობაში მხოლოდ საგანმანათლებლო საქმიანობით იყო დაკავებული. „მუსტაფა ჩაბუქს თურქული მხარე ტერორიზმისათვის ხელშეწყობას ედავება, რაც სრული აბსურდია. 100 000-მდეა იმ ადამიანების რაოდენობა, რომლებიც მხარს მის გათავისუფლებას უჭერენ. დარწმუნებული ვართ, სამართალი იზეიმებს და ბატონ მუსტაფას თურქულ მხარეს არ გადასცემენ. მუსტაფა ჩაბუქი თურქეთში სამართალს ვერ იპოვის,“ - ამბობს „ინტერპრესნიუსის“ ცნობით ნოდარ ჭუმბურიძე.

მუსტაფა ემრე ჩაბუქის მხარდასაჭერად 7 ივნისს კანცელარიასთან აქცია გაიმართება

24 მაისს თბილისში თურქეთის მხარის მოთხოვნით, დემირელის კერძო კოლეჯის ხარისხის მართვის მენეჯერი მუსტაფა ემრე ჩაბუქი დააკავეს. 25 მაისს კი თბილისის საქალაქო სასამართლომ მუსტაფა ემრე ჩაბუქს 3- თვიანი წინასაექსტრადიციო პატიმრობა შეუფარდა. თურქეთის მხარე დაკავებულის ექსტრადირებას მოითხოვს და მას ბრალად ფეტულა გიულენის ორგანიზაციასთან თანაშრომლობა ედება, რომელიც თურქეთში ტერორისტულ ორგანიზაციად მიიჩნევა.