„პროპორციულ საარჩევნო სისტემაზე, შესაძლოა, არა 2020 წელს, არამედ 2024 წლიდან გადავიდეთ“,- ამის შესახებ დღეს გამართულ ბრიფინგზე პარლამენტის თავმჯდომარემ, ირაკლი კობახიძემ განაცხადა. 

მისი განმარტებით, ამ თემაზე უმრავლესობის წევრებთან დამატებითი კონსულტაციები ექნება და რამდენიმე ვარიანტს განიხილავენ. მიმდინარე კვირას კი, როცა საკონსტიტუციო ცვლილებების პროექტის საპარლამენტო განხილვები დაიწყება, გამოიკვეთება, როგორ მოხდება პროპორციულ საარჩევნო სისტემაზე გადასვლა. 

„ერთ-ერთი ვარიანტია ის, რომ შესაძლებელია, პროპორციულ საარჩევნო სისტემაზე გადავიდეთ არა შემდგომი, არამედ იმის შემდგომი არჩევნებიდან. სამწუხაროდ, ოპოზიციამ კონსულტაციების სირთულის მხრივ ისეთივე მდგომარეობაში ჩაგვაყენა, რა მდგომარეობაც 2015-2016 წლებში იყო. მაშინ პროპორციულ სისტემაზე გადასვლის ინიციატივის წარდგენა საფეხურებრივად გახდა შესაძლებელი. დღეს იმავე რთულ მდგომარეობაში ვართ“,- განაცხადა ირაკლი კობახიძემ.