„ტოვებთ იმ საარჩევო სისტემას, რომელიც თქვენ თვითონვე მონათლეთ ქვეყნისთვის სახიფათოდ. როცა ოპოზიციაში იყავით, მის შეცვლას ითხოვდით, შემდეგ დაპირდით ხალხს სისტემის შეცლას და გადააგდეთ“,- ამ სიტყვებით მიმართა გიგა ბოკერიამ საპარლამენტო უმცირესობას, კონსტიტუციაში დაგეგმილი ცვლილებების განხილვისას. მისი თქმით, მათ ხალხს პრეზიდენტის არჩევის უფლება წაართვეს.
ბოკერიას შეფასებით, უმრავლესობას არც მომავალში შემოაქვს სრულფასოვანი სისტემა და მახინჯ ბარიერს სთავაზობს პარტიებს.
„რადგან გაქვთ ილუზია, რომ ამ მეთოდით ხელისუფლების შენარჩუნებას შეძლებთ. ვენეციის კომისია გადააგდეთ. ყველას დაგვიპრდით, რომ მათ სამართლიან შენიშვნებს გაითვალისწინებდით და მოატყუეთ. ქვეყნის შიგნით ვერც ერთ პარტიასთან და არასამთავრობო ორგანიზაციასთან ვერც ერთ მნიშვნელოვან საკითხზე კონსენსუსს ვერ მიაღწიეთ. პრინციპული უარი თქვით ჩვენს შეთავაზებაზე, რომ ხალხისთვის გვეკითხა შემოთავაზებული ცვლილებების თაობაზე, რადგან ამისიც გეშიანიათ. უფრო მეტიც, ხალხს იმის უფლებაც წაართვით, მომავალში აკონტროლოს, რამდენ ფულს წაართმევს მას მთავრობა. დაარტყით მიწის კერძო საკუთრებას, დაარტყით რწმენის თავისუფლებას. აჰყევით რუსულ პროპოგანდას, რომ თურმე დასავლეთი არის საფრთხე ჩვენი ტრადიციებისთვის,“- მიმართა „ქართული ოცნების“ დეპუტატებს ბოკერიამ.
მისი შეფასებით, ზიანი, რომელიც მათ მოაქვთ, დიდხანს გაგრძელდება, მაშინაც, როცა აღარ იქნებიან და გადაირჩევენ. ბოკერიამ ისინი მაოხრებელ გზირს შეადარა.
„ორი ამბავი მაქვს თქვენთვის, ცუდი და კარგი: - თქვენთვის ცუდი და ქვეყნისთვის კარგი ის არის, რომ ეს ყველაფერი თქვენ არ გიშველით. შემდეგ არჩევნებზე ყველა ვარიანტში გადაგირჩევენ - ეს გარდაუვალია! მაგრამ არის კარგი ამბავიც - ისტორიის სახელმძღვანელოებში დარჩებით იმის მაგალითად, თუ როგორი მთავრობა არ უნდა ჰყავდეს ქვეყნას. დიდხანს ემახსოვრებით ყველას”.
