მთავრობის დღევანდელ სხდომაზე განათლებისა და მეცნიერების მინისტრმა, ვიცე-პრემიერმა ალექსანდრე ჯეჯელავამ განაცხადა, რომ წელს საზაფხულო ბანაკებში ქალაქისა და სოფლის მცირე სკოლებიდან 11 000 ბავშვი დაისვენებს.
„ბავშვები ერთი კვირის განმავლობაში შვიდ ბანაკში დაისვენებენ. ეს მხოლოდ დასვენება არ არის, ყველა ბანაკი შემეცნებითია. გვაქვს ეკობანაკი, გვაქვს თავდაცვის სამინისტროსთან ერთად ორგანიზებული ბანაკი; პროფესიულ სასწავლებელთან ერთობლივი ბანაკი. იმედი გვაქვს, რომ მომავალში იგი მთელი საქართველოს მასშტაბით მოიცავს მცირე სკოლებს. კვებას და ტრანსპორტირებას სახელმწიფო უზრუნველყოფს. დიდი მნიშვნელობა აქვს ამას ამ ბავშვების უნარების ჩამოყალიბებისთვის. ჩვენ გვინდა, რომ მომავალ წლებში ეს პროცესი გაიზარდოს და, ფაქტობრივად, ყველა მცირე სკოლა დავფაროთ. წელს 11 000 ბავშვია. შედარებისთვის, შარშან ბანაკებში სულ 4 000 ბავშვი იყო“, - განაცხადა ჯეჯელავამ.
განათლებისა და მეცნიერების მინისტრმა ყველა სამინისტროს მხარდაჭერისთვის მადლობა გადაუხადა.