საქართველოს საზღვართან, გამშვებ პუნქტზე დაკავებული აზერბაიჯანელი ჟურნალისტი კამრან მაჰმუდოვი გაათავისუფლეს - ამის შესახებ ინფორმაციას აზერბაიჯანელი ჟურნალისტი სეიმურ კაზიმოვი ავრცელებს. 

ჟურნალისტის დაკავების მიზეზი ამ დრომდე უცნობია. 

მოგვიანებით მაჰმუდოვმა „ლიბერალს" განუცხადა, რომ მის დაკავებაში ქართული მხარე არ მონაწილეობდა.

მისი დაკავების შესახებ ინფორმაცია ჟურნალისტმა ხადიჯა ისმაილოვამ გაავრცელა. 

ისმაილოვას თქმით, მაჰმუდოვი საქართველოში ბრუნდებოდა, როცა იგი სასაზღვრო გამშვებ პუნქტზე დააკავეს და უთხრეს, რომ მას პოლიცია ეძებდა. 

„ჩვენ ერთად ვმუშაობდით რამდენიმე წლის განმავლობაში „რადიო თავისუფლების" რადიო გადაცემაზე After Work, მე წამყვანი ვიყავი, ის - პროდიუსერი. „რადიო თავისუფლების" ბაქოს ოფისის დახურვის შემდეგ კამრანი სხვადასხვა გადაცემებს უძღვებოდა სხვადასხვა პლატფორმებზე, რომლებიც მიმდინარე საკითხებს ეხებოდა. იგი თამამი ჟურნალისტია. მისი დაკავებისთვის სხვა მიზეზი არ არსებობს" - წერდა ხადიჯა ისმაილოვა.