დღეს გამართულ პრესკონფერენციაზე 14-მა არასამთავრობო ორგანიზაციამ განაცხადა, რომ ორგანიზაციები აღარ ჩაერთვებიან კონსტიტუციის საპარლამენტო განხილვებში.
„საარჩევნო სისტემაზე მმართველი პარტიის გადაწყვეტილება მიუღებელია. რჩება შთაბეჭდილება, რომ შერეული სისტემის შენარჩუნებით, მმართველი გუნდი ცდილობს შეიქმნას გარანტიები, რომელიც ხელს შეუწყობს უპირატესობის მოპოვებაში 2020 წლის არჩევნებზე“, - განაცხადა „სამართლიანი არჩევნების“ აღმასრულებელმა დირექტორმა, მიხეილ ბენიძემ
ორგანიზაციების განცხადებით, საკონსტიტუციო ცვლილებები იქნება არა კონსენსუსის და ფართო საზოგადოების შეთანხმების საგანი, არამედ ერთი პარტიის მიერ დახურულ კარს მიღმა მიღებული გადაწყვეტილების შედეგი.
პარლამენტის იურიდიულ საკითხთა კომიტეტის თავმჯდომარე ეკა ბესელია არასამთავრობო სექტორის გადაწყვეტილებას გამოეხმაურა და განაცხადა, რომ მათი შენიშვნების 80 პროცენტი საკონსტიტუციო ცვლილებების დოკუმენტში გათვალისწინებულია.
„სამოქალაქო სექტორში მტრის ხატის ძებნა არ მიყვარს და ამიტომ, ამაზე შეფასებებს არ გავაკეთებ. ეს ყველაფერი სამწუხაროა, რადგან ყველა მათგანი კომისიის და განხილვის ფარგლებში ჩართული იყო. მათი მოთხოვნისა და მოსაზრებების ძალიან დიდი ნაწილი გათვალისწინებული იყო. ის, რომ კონსენსუსის გამო ვადებთან მიმართებაში გარკვეული ცვლილება მოხდა, ბუნებრივია, რადგან კონსენსუსი გუნდის შიგნითაც გვჭირდება და გარეთაც. სხვაგვარად შეთანხმების მიღწევა შეუძლებელი იქნებოდა. როცა გარედან კონკრეტული მოთხოვნების დაყენება ხდება, ყოველთვის მაქსიმუმს ითხოვ. შეუძლებელია, ასეთი იდეალური მოცემულობის შექნა. მათი პოზიციის თითქმის 80% გაზიარებულია. ის, რომ ამ პროცესში ყველამ ყველას თავისი წინადადების რეალობა სთხოვოს, ეს შეუძლებელი ამოცანაა“, - განაცხადა ეკა ბესელიამ .