ახალგაზრდა იურისტთა ასოციაციის განცხადებით, თბილისის საქალაქო სასამართლომ უსაფუძვლოდ შეწყვიტა საქართველოს ახალგაზრდა იურისტთა ასოციაციის საქმის განხილვა მოთხოვნის იმ ნაწილში, რომელიც „პანორამა თბილისის“ პროექტის - ,,სოლოლაკის მაღლობი“ და „სოლოლაკის ბაღები“ სამშენებლო ნებართვების ბათილად ცნობას ეხებოდა.
„სასამართლომ ჩათვალა, რომ საია-ს გასაჩივრების ვადები გასული ჰქონდა. თუმცა საქმეში არსებული მტკიცებულებები ადასტურებს, რომ გასაჩივრების ვადები დაცული იყო. საია მიიჩნევს, რომ პროცედურების დაუცველობის მოტივით სარჩელის განხილვაზე უსაფუძვლოდ უარის იწვევს პროცესის გაჭიანურებას, რაც საქმის არსებით განხილვას აჭიანურებს", - აცხადებენ ორგანიზაციაში.
სასამართლოს მიერ მიღებულ განჩინებას საია სააპელაციო სასამართლოში გაასაჩივრებს.
საიას სარჩელით ითხოვს „პანორამა თბილისის“ პროექტის ფარგლებში გაცემული მშენებლობის ნებართვების ბათილად ცნობას - იმ ბრძანებების უკანონოდ ცნობას, რომლის საშუალეითაც კომპანიას ნებართვა მიეცა „სოლოლაკის მაღლობისა“ და „სოლოლაკის ბაღების“ მშენებლობაზე.
„ჩვენს ხელთ არსებული ოფიციალური დოკუმენტებით დასტურდება, რომ ორივე სამშენებლო ნებართვა გაცემულია ქალაქ თბილისში არსებული ისტორიული ლანდშაფტის დაცვის ზონაში, კულტურული მემკვიდრეობის კანონი კრძალავას მსგავსი ტიპის სამუშაოების წარმოებას, მნიშვნელოვანია, რომ ის მარეგულირებელი აქტები, რომლითაც განსაზღვრულია თბილისში ისტორიული ლანდშაფტის დაცვის ზონა, ეს არის მიღებული 1985 წელს, თუმცა დღემდე არის უცვლელი და საქართველოს მთავრობას ეს ზონები არ შეუცვლია, ამიტომ ამ ზონებში მოქმედებს ის რეჟიმი, როდესაც აფასებს კულტურული მემკვიდრეობის კანონი. სამწუხაროდ, გადაწყვეტილების მიღების დროს, არც ერთ უწყებას, რომელიც ამ პროცესში იყო ჩართული, ყურადღება არ გაუმახვილებია ამ საკითხზე, შესაბამისად, ჩვენ დღეს ვითხოვთ სწორედ, რომ ეს ორი სამართლებრივი აქტი, რომლითაც ბრძანების საშუალებით მიეცათ ნებართვა კომპანიას „სოლოლაკის მაღლობზე“ და „სოლოლაკის ბაღების“ მშენებლობაზე, ბათილად იქნეს ცნობილი, ვინაიდან ის პირდაპირ კონფლიქტშია კულტურული მემკვიდრეობის კანონთან. ჩვენ წარმოვადგენთ შესაბამის რუკას, რომელიც არის ოფიციალური დოკუმენტი და რომელიც ადასტურებს, რომ ეს მშენებლობა მიმდინარეობს ისტორიული ლანდშაფტის დაცვის ზონაში. ეს მშენებლობები არის უკანონო, ვინაიდან ეწინააღმდეგება კულტურული მემკვიდრეობის კანონის მოთხოვნებს, კანონს ეწინააღმდეგება იმიტომ, რომ მშენებლობა მიმდინარეობს იმ ზონაში, სადაც მშენებლობა აკრძალულია“, - აცხადებს „ახალგაზრდა იურისტთა ასოციაციის“ იურისტი, სულხან სალაძე
