მოსამართლეთა კონფერენციაზე იუსტიციის საბჭოს ოთხი მოსამართლე წევრი აირჩიეს. ხმების დათვლა რამდენიმე წუთის წინ დასრულდა.
იუსტიციის საბჭოს მოსამართლე წევრები გახდნენ: ირაკლი ბონდარენკო (თბილისის სააპელაციო სასამართლოს მოსამართლე) 256 ხმით, ვასილ მშვენიერაძე (თბილისის საქალაქო სასამართლოს მოსამართლე) 243 ხმით, დიმიტრი გვრიტიშვილი (ქუთაისის სააპელაციო სასამართლოს თავმჯდომარე) 268 ხმით, ირაკლი შენგელია (თბილისის სააპელაციო სასამართლოს ადმინიატრაციულ საქმეთა პალატის თავმჯდომარე) 259 ხმით. ისინის საბჭოში თამარ ალანიას, მერაბ გაბინაშვილს, შოთა გეწაძეს და ლევან მურუსიძეს ჩაანაცვლებენ.
მოსამართლეებს საბჭოს წევრების არჩევა 7 კანდიდატიდან შეეძლოთ: თეიმურაზ სვანიძე, თამარ ბეჟანიშვილი, ირაკლი ბონდარენკო, ვასილ მშვენიერაძე, ირაკლი შენგელია, ხვიჩა კიკილაშვილი, დიმიტრი გვრიტიშვილი.
იმისთვის, რომ კანდიდატი საბჭოს წევრი გახდეს, მან დამსწრეთა ხმების 2/3-ის უმრავლესობა უნდა მიიღოს.
რამდენიმე დღის წინ პარლამენტმა საბჭოს არამოსამართლე წევრები აირჩია. საბჭოს შემადგენლობა განახლდა იმის გამო, რომ მოქმედ წევრებს უფლებამოსილების 4-წლიანი ვადა ამოეწურათ.