საპარლამენტო უმრავლესობის წევრი და იურიდიულ საკითხთა კომიტეტის თავმჯდომარე ეკა ბესელია ამბობს, რომ თვითმმართველობის არჩევნები მიმდინარე წლის 21 ოქტომბერს გაიმართება. მისივე თქმით, ნაკლებად სავარაუდოა, საარჩევნო თარიღთან დაკავშირებით ცვლილებები მოხდეს, მთავარია, დაცული იყოს კანონით დადგენილი ორთვიანი ვადა.
„ორთვიანი საარჩევნო ციკლი არის კანონით დადგენილი კონკრეტული ვადა. ეს ვადა იქნება დაცული. წინა გამოცდილებით ვნახეთ, რომ ხანგრძლივ წინასაარჩევნო კამპანიას გარკვეული სირთულეები ახლავს. ბოლო საპარლამენტო არჩევნებს, რომელიც ძალიან ხანგრძლივი იყო საარჩევნო თვალსაზრისით, ახლდა სირთულეები, რადგან ბევრად ადრე მოხდა მისი გამოცხადება“, - ამბობს ეკა ბესელია.
თვითმმართველობის არჩევნების თარიღთან დაკავშირებით დღეს საქართველოს პრეზიდენტმა გიორგი მარგველაშვილმა განაცხადა. მისი თქმით, ადგილობრივი თვითმმართველობის არჩევნები ოქტომბრის მესამე კვირის ბოლოს გაიმართება.