დემირელის კოლეჯის პარტნიორი სკოლები ხელისუფლებას დემირელის კოლეჯის დაკავებული დირექტორის მუსტაფა ემრე ჩაბუქის საკითხთან დაკავშირებით მიმართავენ და მისი ექსტრადიციის პროცედურების შეჩერებას მოითხოვენ.
როგორც სკოლა-ლიცეუმ „სხივის“ ხარისხის მართვის მენეჯერმა, თინათინ ჩხაიძემ ჟურნალისტებს განუცხადა, დემირელის კოლეჯის პარტნიორი სკოლების წარმომადგენლები ერთობლივად ხელს აწერენ განცხადებას და აფიქსირებენ მხარდაჭერას მუსტაფა ემრე ჩაბუქის მიმართ, ასევე მოითხოვენ შეჩერდეს მისი ექსტრადირება. მისივე ინფორმაციით, განცხადებას ხელს აწერენ ხუთი სკოლა-ლიცეუმის: რუსთავის რუსთაველის სახელობის, მარნეულის დავით აღმაშენებელის სახელობის, ქუთაისის ნიკო ნიკოლაძის სახელობის, თბილისის დემირელის სახელობისა და სკოლა ლიცეუმ „სხივის“ წარმომადგენლები.
„სასწავლო წლის ბოლო შემაჯამებელი შეხვედრა ყოველწლიურად იმართება, თუმცა ჩვენი შეხვედრის ერთ-ერთი მთავარი საკითხი წელს მუსტაფა ემრე ჩაბუქის დაკავება და მისი ექსტრადირებაა. ჩვენ დღეს შევიმუშავებთ ერთობლივ ტექსტს, რომელსაც ხელს მოვაწერთ ხუთი სკოლის პედაგოგები და კურსდამთავრებულები. ჩვენ ვითხოვთ, შეწყდეს საექსტრადიციო პროცედურები, ასევე თავდებში ვუდგებით ბატონ ემრე ჩაბუქს, რომ მის წინააღმდეგ წარდგენილი ბრალი სიმართლეს არ შეესაბამება და ის უდანაშაულოა“, - განაცხადა თინათინ ჩხაიძემ.
