საქართველოს პარლამენტის თვითმმართველობის კომიტეტის თავმჯდომარე გრიგოლ ლილუაშვილი არ გამორიცხავს, რომ აზერბაიჯანელი ჟურნალისტის, აფგან მუხთარლის საქმეზე დროებითი საპარლამენტო საგამოძიებო კომისია შეიქმნას. ამის შესახებ ლილუაშვილმა ჟურნალისტებთან საუბრისას განაცხადა. მისივე თქმით, კომისიის შექმნის წინააღმდეგი მმართველ გუნდში არავინ არ არის.
„საბოლოო ჯამში, თუკი საზოგადოებრივი ინტერესი არ დაკმაყოფილდება, ამას ვერ ავცდებით. კომისიის შექმნის წინააღმდეგი გუნდში არავინ არ არის, უბრალოდ, საუბარი იყო, გამოძიებისთვის საშუალება მიგვეცა, ეს საქმე მაქსიმალურად გამოეძიებინათ და საზოგადოებისთვის ინფორმაცია მიეწოდებინათ. არ გამოვრიცხავ, რომ ამას მხარი დავუჭიროთ. გასაგებია, რომ ქართული სპეცსამსახურები ამაში არ მონაწილეობდნენ, თუმცა გამოსაძიებელია, ვინ მონაწილეობდა და ჩვენი სპეცსამსახურების გვერდის ავლით, ჩვენს ტერიტორიაზე ვინ მოქმედებდა. ეს ჩვენთვის ძალიან მნიშვნელოვანია“, - განაცხადა ლილუაშვილმა.
აზერბაიჯანელი ჟურნალისტის, აფგან მუხთარლის საქმეზე დროებითი საპარლამენტო საგამოძიებო კომისიის შექმნას ოპოზიცია მოითხოვს.
