მთავრობის განკარგულებით, „წითელი ნუსხით“ დაცული მცენარეების მოჭრაზე კიდევ ერთი ნებართვა გაიცა.
განკარგულების მიხედვით, ხეების მოჭრის უფლება „საქართველოს მილსადენის კომპანიის საქართველოს ფილიალს“ მცხეთის, გარდაბნისა და ჭიათურის მუნიციპალიტეტების ტერიტორიებზე მიეცა.
ნებართვა საერთო ჯამში „წითელი ნუსხის“ 191 პატარა თელადუმაზე და 1 კაკლის ხეზე გაიცა.
განკარგულებით, „საქართველოს მილსადენის კომპანიის საქართველოს ფილიალი“ ვალდებულია, მოჭრილი მერქნული რესურსი დაუკოტრავი სახით, სახეობების მიხედვით, დაასაწყობოს ეროვნული სატყეო სააგენტოს მიერ მითითებულ ტერიტორიაზე და გადასცეს მას მიღება-ჩაბარების აქტით, ხოლო „საქართველოს ნავთობისა და გაზის კორპორაციის“ საკუთრებაში არსებული მიწის ნაკვეთებზე მოჭრილი მერქნული რესურსი გადასცეს სს „საქართველოს ნავთობისა და გაზის კორპორაციას“, საქართველოს კანონმდებლობის შესაბამისად.