პარტია „ქართული ოცნება-დემოკრატიული საქართველოს“ პრესსამსახური ახალციხის მუნიციპალიტეტის სოფელ ურაველში „ნაციონალური მოძრაობის“ წევრის, სოფლის ყოფილი გამგებლის, ბეგლარ კაპანაძის, მისი მამისა და შვილის ცემის ფაქტზე განცხადებას ავრცელებს.
„გვსურს, გამოვეხმაუროთ ახალციხის მუნიციპალიტეტის სოფელ ურაველში მომხდარი ფიზიკური დაპირისპირების ფაქტს. პარტია „ქართული ოცნება-დემოკრატიული საქართველო“ მომხდარის გამო, შეშფოთებას გამოთქვამს და ვინც უნდა იყოს დაპირისპირების მხარე, ძალადობის ყოველგვარ ფაქტს კატეგორიულად გმობს.
მოვუწოდებთ სამართალდამცავ ორგანოებს, სამართალდარღვევის ფაქტზე დროული რეაგირება მოახდინონ. ასევე, მოვუწოდებთ პოლიტიკურ პარტიებს, მსგავსი ფაქტები პოლიტიკური მიზნებისთვის არ გამოიყენონ“, - ნათქვამია განცხადებაში.
ახალციხეში, სოფელ ურავლის ტყეში სოფლის ყოფილი გამგებელი და „ნაციონალური მოძრაობის“ წარმომადგენელი, ბეგლარ კაპანაძეს სცემეს. აღნიშნულ ინფორმაციას „სამხრეთის კარიბჭემ გაავრცელა. ფიზიკური შეურაცხყოფა მის 80 წლის მამასა და 23 წლის შვილსაც მიაყენეს. კაპანაძეების ცემის ფაქტი „ლიბერალს“ შინაგან საქმეთა სამინისტრომაც დაუდასტურა.
გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს. თუმცა უწყებაში აცხადებენ, რომ ჯერ უცნობია, ვინ მონაწილებდა მათ ცემაში და ამას გამოძიება დაადგენს.
