თურქეთში საქართველოს ელჩის, ირაკლი კოპლატაძის განცხადებით, თურქეთში მომხდარი მიწისძვრის შედეგად დაშავებულთა შორის, საქართველოს მოქალაქეები არ არიან. მისივე თქმით, ღამის განმავლობაში ცხელ ხაზზე ქართველი დამსვენებლები რეკავდნენ, ძირითადად, მიწისძვრის შიშის გამო. 

„ამ დროისთვის, საელჩოდან მიღებული ინფორმაციის თანახმად, თურქეთში მიწისძვრის ეპიცენტრი იყო საბერძნეთის მხარეს, ეგეოსის ზღვასთან. ბოდრუმში იყო საკმაოდ ძლიერი მიწისძვრა. დაზიანებულია ძველი შენობები, მაგრამ, რაც მთავარია, მსხვერპლი არაა. ამ მომენტისთვის, 90 ადამიანია დაშავებული. შეინიშნებოდა შიში და პანიკური მდგომარეობა, მათ შორის ღამის განმავლობაში საქართველოს მოქალაქეების მხრიდან იყო ცხელ ხაზზე შემოსული ზარები, ძირითადად, შიშიდან გამომდინარე. თუმცა, ამ დროისათვის, დაშავებულთა შორის არ არიან საქართველოს მოქალაქეები“ - განაცხადა ირაკლი კოპლატაძემ.

ძლიერი მიწისძვრა მოხდა ეგეოსის ზღვაში, რის შედეგადადაც საბერძნეთის კუნძულ კოსზე 2 ადამიანი დაიღუპა, ბიძგები იყო თურქეთის სანაპიროზეც, ბოდრუმში. მიწისძვრა ადგილობრივი დროით წუხელ, 01:31 საათზე მოხდა. 

BBC-ის ინფორმაციით, ბიძგების სიმძლავრემ 6.7 მაგნიტუდას მიაღწია. დაშავებულია 100-მდე ადამიანი, ტურისტულ ნაწილში. ასევე დანგრეულია რამდენიმე შენობა. გეოლოგიური სამსახურის ინფორმაციით, მიწისძვრის ეპიცენტრი ეგეოსის ზღვაში, კუნძულიდან 16 კილომეტრში იყო. 

100-მდე დაშავებული და 2 დაღუპული - მიწისძვრა საბერძნეთსა და თურქეთში