წაღვერის მიმდებარე ტერიტორიაზე, ტყეში გაჩენილი ხანძრის ლოკალიზება ჯერჯერობით ვერ მოახერხეს - ამის შესახებ „ლიბერალს“ შინაგან საქმეთა სამინისტროს საგანგებო სიტუაციების მართვის სააგენტოში უთხრეს. მათივე განცხადებით, არ აქვთ ზუსტი მონაცემები, რა ფართობზეა გავრცელებული ხანძარი.
„ჯერჯერობით, ხანძრის ლოკალიზება არ მომხდარა, ადგილზე მუშაობს 100 მაშველი მაინც. გარდა ამისა, სასაზღვრო დაცვის პოლიციაც ჩართული პროცესში; იქვე არის ჩვენი შტაბიც; ვერტმფრენი მუშაობს აქტიურად. არ გვაქვს ზუსტი მონაცემები, რა ფართობზეა გავრცელებული ხანძარი. აქამდე გახმაურებული ინფორმაცია, რომ დაახლოებით 6000 კვ.მ-ზე გავრცელდა ხანძარი, იყო საორიენტაციო, დაახლოებითი. მისი გაზომვა ვერ მოხდებოდა, რადგან არის რთულად მისადგომი ადგილები და ზუსტი ფართობის დადგენა ჯერჯერობით შეუძლებელია, ამაზე საუბარი მაშინ იქნება შესაძლებელი, როცა ხანძრის ლოკალიზება მოხდება“, - განაცხადეს საგანგებო სიტუაციების სამსახურში.