ტელეკომპანია „რუსთავი 2-ში" გაჩენილი ხანძრის შესახებ არხის საინფორმაციო სამსახურის ხელმძღვანელი, ნოდარ მელაძე საუბრობს და აცხადებს, რომ სავარაუდოდ სამონტაჟოების ერთი ნაწილი გამოსულია მწყობრიდან. მისი განცხადებით, სტუდიებში ძლიერი დაკვამლიანებაა. ნოდარ მელაძის თქმით, ხანძარი საკმაოდ ძლიერი იყო. ამის შესახებ ინფორმაციას „რუსთავი 2" ავრცელებს.

მისივე განმარტებით, იყო რისკი, რომ „კურიერის" კამერები დამწვარიყო, თუმცა თანამშრომლებმა მოახერხეს ტექნიკა უსაფრთხო ადგილას გადაეტანათ. 

როგორც მელაძე აცხადებს, ხანძრის გამომწვევი მიზეზი გამოძიებამ უნდა დაადგინოს. 

„რუსთავი 2"-ის მაუწყებლობა რამდენიმე წუთის განმავლობაში გათიშული იყო, ამ დროისთვის მაუწყებლობა აღდგა. 

მომხდარზე შსს-მ გამოძიება სსკ 187-ე მუხლის მე-2 ნაწილით დაწყო, რაც ნივთის დაზიანებას ან განადგურებას გულისხმობს. საგანგებო სიტუაციების მართვის სააგენტოს ინფორმაციით, დამწვარია შენობის დაახლოებით 40–45 კვადრატული მეტრის ფართი.