საქართველოს პარლამენტმა მარიხუანასთან დაკავშირებით რამდენიმე კანონში ცვლილებები შეიტანა.
შედეგად, მცენარე კანაფის და მარიხუანის მოხმარებისთვის და მცირე ოდენობით შეძენა-შენახვისთვის პირი 500 ლარით დაჯარიმდება, ან დაეკისრება გამასწორებელი სამუშაო 1 თვიდან 6 თვემდე ვადით.
განმეორების შემთხვევაში (დაჯარიმებიდან ან გამასწორებელი სამუშაოს დაკისრებიდან 1 წლის განმავლობაში) კი მცენარე კანაფის და მარიხუანის მოხმარება და მცირე ოდენობით შეძენა-შენახვა უკვე სისხლის სამართლის კოდექსით დაისჯება და პირს შეიძლება დაეკისროს ჯარიმა ან საზოგადოებისათვის სასარგებლო შრომა ვადით 100-დან 160 საათამდე. კანონის მიხედვით, ჯარიმა 1 500 ლარზე ნაკლები არ იქნება.
რაც შეეხება ოდენობებს, კანონმდებლობის მიხედვით, 10 გრამამდე მცენარე კანაფი მცირე ოდენობად მიიჩნევა, გამომშრალი მარიხუანის მცირე ოდენობა 5 გრამამდეა, ხოლო ნედლის - 10 გრამამდე.
საკონსტიტუციო სასამართლოს გადაწყვეტილებიდან გამომდინარე, 70 გრამამდე გამოშრალი მარიხუანის ფლობითვის საპატიმრო სასჯელის გამოყენება არაკონსტიტუციურია, თუმცა ამ ქმედებისთვის სისხლის სამართლის კოდექსით გათვალისწინებულია ჯარიმა ან საზოგადოებისათვის სასარგებლო შრომა ვადით 160-დან 220 საათამდე (რაც პირს ნასამართლევის სტატუსისგან არ ათავისუფლებს).