არასამთავრობო ორგანიზაციები კონსტიტუციაში შესატანი ცვლილებების პროექტის იმ ნაწილის შესახებ, რომელიც რწმენისა და აღმსარებლობის თავისუფლების საკითხებს ეხება, საქართველოს პარლამენტს, საქართველოს პრეზიდენტს, ვენეციის კომისიას, გაეროს ადამიანის უფლებათა კომიტეტის სპეციალურ მომხსენებელს რელიგიის საკითხებში, ევროპის საბჭოს მინისტრთა კომიტეტსა და ევროპულ კომისიას რასიზმისა და შეუწყნარებლობის წინააღმდეგ განცხადებით მიმართავენ.
„ხელმომწერები მიიჩნევენ, რომ წარმოდგენილი ცვლილებები საფრთხეს უქმნის რელიგიის თავისუფლების დაცვას საქართველოში და წარმოშობს უფლებაში არამართლზომიერი ჩარევის მაღალ რისკს.
კერძოდ, კონსტიტუციის ცვლილებების პროექტის მე-16 მუხლის მე-2 პუნქტში, რელიგიის თავისუფლების შეზღუდვის ფარგლები ზედმეტად გააფართოვდა. მათ შორის, იმაზე მეტად, ვიდრე ამას ვენეციის კომისიის რეკომენდაცია, ადამიანის უფლებათა ევროპული კონვენცია და სამოქალაქო და პოლიტიკური უფლებების პაქტი ითვალისწინებს.
პროექტით გათვალისწინებული შეზღუდვის ისეთი საფუძვლები, როგორიცაა სახელმწიფო უსაფრთხოება, დანაშაულის თავიდან აცილება და მართლმსაჯულების განხორციელება, რელიგიის თავისუფლებაში ზოგადი საფუძვლებით უხეში ჩარევის რისკებს წარმოშობს ყველა რელიგიური გაერთიანებისთვის.
ნეგატიურად არის შეფასებული კონსტიტუციური პროექტის მე-8 მუხლიც, რომლის მიხედვითაც, რწმენის თავისუფლება ცალკეულ სიკეთედ აღარ არის განხილული და წარმოდგენილია მართმადიდებელი ეკლესიის როლთან ერთობლიობაში.
სახელმწიფომ რწმენისა და აღმსარებლობის თავისუფლება შემოზღუდა მართლმადიდებელი ეკლესიის წვლილის აღიარებით, რაც უფლებრივი თვალსაზრისით, სტანდარტის გაუარესებისკენ გადადგმული ნაბიჯია.
წერილის ავტორები მიმართავენ ადრესატ სახელმწიფო და საერთაშორისო ინსტიტუტებს, გამოიყენონ მათ ხელთ არსებული ყველა შესაძლებლობა, რათა საქართველოს კონსტიტუციური ცვლილებების ფარგლებში არ მოხდეს რელიგიის თავისუფლების დაცვის სტანდარტების გაუარესება" - ნათქვამია განცხადებაში.
