დემურ სტურუას სიკვდილიდან 1 წელი გავიდა. 2016 წლის 7 აგვისტოს მან სიცოცხლე თვითმკვლელობით დაასრულა. მანამდე კი წერილი დატოვა, სადაც თვითმკვლელობის მიზეზებზე საუბრობდა.
„პოლიციელი გოდერძი მემუქრებოდა ვინმეს პლანი ხო არ აქო დათესილიო, უნდა მითხრაო. თორემ რაც არ გაგიკეთებია, იმას შეგტენიო, მემუქრებოდა და მანქანაში გამლახა, წამიყვანა იანეთისკენ და აქ მოგკლავო. მემუქრებოდა გოდერძი თევზაძე - მილიციელი. მილიციასთან უნდა ითანამშრომლოო, ვის აქვს და ვის არაო პლანი დათესილიო ან კულაშშიო ან დაფნარშიო და საჯავახოშიო. ეს მოხდა 07.08.2016 აგვისტოს, კარგად გემშვიდობებით ყველას. დემური სტურუა. 20:10. დედა დარჩი მარტო, მაგრამ რა ვქნა“.
დემურ სტურუას თვითმკვლელობამდე მიყვანასა და მის მიმართ უფლებამოსილების გადამეტებაში ბრალდებული პოლიციელი გოდერძი თევზაძე სასამართლომ გაამართლა.
პროკურატურის განცხადებით, უწყება არ ეთანხმება პირველი ინსტანციის გადაწყვეტილებას და გამამართლებელ განაჩენს სააპელაციო სასამართლოში გაასაჩივრებს.