როგორც „ლიბერალს“ პროკურატურის პრესსამსახურში განუცხადეს, გორის რაიონის სასამართლომ გორის გვირაბთან მომხდარი ავარიის დროს დაღუპული ბექა ხახუბიას საქმეზე, საპატრულო პოლიციის სამი თანამშრომელს 1000 ლარიანი გირაო შეუფარდა. პროკურატურის განცხადებით, სასამართლომ პოლიციელების თანამდებობიდან გადაყენების გადაწყვეტილებაც მიიღო.
პროკურატურა სასამართლოს მათთვის აღკვეთის ღონისძიების სახით 5 000 ლარის ოდენობით გირაოს შეფარდების და თანამდებობიდან გადაყენების შუამდგომლობით მიმართავდა.
პროკურატურამ ბექა ხახუბიას გარდაცვალების ფაქტზე სამ პოლიციელს ბრალი დღეს წარუდგინა.
გამოძიება საპატრულო პოლიციის თანამშრომლებს სისხლის სამართლის კოდექსის 333-ე და 116-ე მუხლების დარღვევას ედავება, რაც სამსახურებრივი უფლებამოსილების გადამეტებას და გაუფრთხილებლობით სიცოცხლის მოსპობას გულისხმობს (სასჯელის სახით ითვალისწინებს თავისუფლების აღკვეთას 5 წლამდე ვადით).
17 მაისს გორის გვირაბთან ავტოსაგზაო შემთხვევის შედეგად ფოთის მაჟორიტარი დეპუტატის ირაკლი ხახუბიას შვილი, 21 წლის ბექა ხახუბია პოლიციის მხრიდან დევნის ოპერაციის დროს დაიღუპა.
