ბათუმში, გენერალ აბაშიძის ქუჩაზე ძლიერი აფეთქების შედეგად რამდენიმე ადამიანი დაშავდა, ორი სახლი დაინგრა და ორსაც ცეცხლი გაუჩნდა. როგორც საქართველოს შინაგან საქმეთა სამინისტროს საგანგებო სიტუაციების მართვის სააგენტოში აცხადებენ, ხანძარი ლიკვიდირებულია. 

„ხანძარი ლიკვიდირებულია. ძლიერი აფეთქების შედეგად 2 სახლი დაინგრა, ერთი მთლიანად, ერთიც - ნაწილობრივ, ორს კი ცეცხლი წაეკიდა. ხანძარი მალე ჩავაქრეთ. დაშავებულია სამი ადამიანი“, - განუცხადეს „ლიბერალს“ საქართველოს შინაგან საქმეთა სამინისტროს საგანგებო სიტუაციების მართვის სააგენტოში. 

შსს-ს ინფორმაციით, აფეთქების მიზეზი, ჯერჯერობით, უცნობია. გამოძიება დაწყებულია სისხლის სამართლის კოდექსის 240-ე მუხლით, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს. გავრცელებული ინფორმაციით, ბუნებრივი აირი აფეთქდა. 

ფოტო: ajaratv.ge