ახალგორში სამოქალაქო აქტივისტი, „ნეტგაზეთის“ „ფრილანსერი“ ჟურნალისტი თამარ მეარაყიშვილი გუშინ, 16 აგვისტოს სამხრეთ ოსეთის დე ფაქტო რესპუბლიკის სამართალდამცავებმა დააკავეს და დაკავებიდან რამდენიმე საათში გაათავისუფლეს, რის შემდეგაც ის პროკურატურაში დაკითხვაზე იმყოფებოდა.
ჟურნალსტმა პირველ არხთან განაცხადა, რომ მას დაკავებისას არაფერი განუმარტეს და ჯერ არც ადვოკატი ყავს.„ახლა სახლში ვარ. უნდა მოვძებნო ხვალამდე ადვოკატი. ეჭვმიტანილი ვარ ცილისწამებაში და ამის გამო დამაკავეს და ჩაატარეს ჩხრეკა. დღეს კი მითხრეს, რომ კიდევ ბევრ ბრალდებას წარგიდგენთო",-განაცხადა პირველ არხთან თამარ მეარაყიშვილმა.
„ნეტგაზეთის“ ინფორმაციით, პროკურატურაში დაბარების ოფიციალური მიზეზი თამარ მეარაყიშვილის მიერ დე ფაქტო რესპუბლიკის მმართველი პარტია „ერთიანი ოსეთის” პატივისა და ღირსების შელახვის ბრალდებას უკავშირდება, რაზეც აქტივისტი 2017 წლის 31 ივლისს იყო დაბარებული.
მეარაყიშვილმა გამოცემა „ეხო კავკაზაზე“ გამოაქვეყნა სტატია, რომელშიც საუბარია ანატოლი ბიბილოვის მხარდამჭერთა თანამდებობებზე დანიშვნაზე. გამოცემის ინფორმაციით, მეარაყიშვილზე საჩივარი ახალგორის სატყეო სამსახურის უფროსმა, პარტია „ერთიანი ოსეთის” წევრმა, სპარტაკ დრიაევმა შეიტანა.
აღსანიშნავია ისიც, რომ თამარ მეარაყიშვილი 8 ივნისს ახალგორიდან ცხინვალში გაიტაცეს.
მეარაყიშვილის დაკავების შესახებ ომბუდსმენის აპარატმაც გაავრცელა განცხადება. სახალხო დამცველი აღნიშნავს, რომ თამარ მეარაყიშვილი, გამოირჩეოდა აქტიური სამოქალაქო პოზიციით და ახალგორის მკვიდრთა უფლებების დასაცავად გამოთქმული კრიტიკული მოსაზრებებით. ამის გამო იგი ბოლო წლებში განიცდიდა ზეწოლას დე ფაქტო ხელისუფლებისაგან, რაც მისი ცხინვალში გატაცებით დასრულდა.
თამარ მეარაყიშვილის დაკავებას სახალხო დამცველი აფასებს, როგორც უკანონოდ თავისუფლების აღკვეთას, სამოქალაქო აქტივისტზე ზეწოლას და მისი გამოხატვის თავისუფლების შეზღუდვას.
„ეს დაკავება ასევე უნდა შეფასდეს, როგორც მისი იძულება, სამუდამოდ დატოვოს ახალგორი. შემაშფოთებელია, რომ ე.წ. სამხრეთ ოსეთში სამოქალაქო აქტივისტებსა და არასამთავრობო ორგანიზაციებზე ზეწოლამ რეგულარული ხასიათი მიიღო“,- ნათქვამია ომბუდსმენის განცხადებაში.
