17 აგვისტოს ბარსელონაში ტერორისტულ თავდასხმაზე პასუხისმგებლობა „ისლამურმა სახელმწიფომ“ აიღო.
ლა რამბლის მოედანზე, ადგილობრივი დროით 16:50 წუთზე, ბარსელონის ერთ-ერთ ბულვარში, ფეხით მოსიარულეთა გზის სავალ ნაწილზე მიკროავტობუსი შევარდა. ტერორისტული თავდასხმის შედეგად 13 ადამიანი დაიღუპა, 100-ზე მეტი კი დაშავდა.
„ბარსელონაში მომხდარი თავდასხმის მონაწილეები ISIS-ის მებრძოლები არიან. მათ შეასრულეს ეს ოპერაცია და ის ჩვენი პასუხია გაერთიანებული, კოალიციაში მყოფი სახელმწიფოების მიმართ“,- ნათქვამია „ისლამური სახელმწიფოს“ მიერ გავრცელებულ განცხადებაში.
დაახლოებით 8 საათის შემდეგ, კამბრილსში, რომელიც 110 კილომეტრითაა დაშორებული ბარსელონას, პოლიციელებმა კიდევ ერთი თავდასხმა აღკვეთეს. მათ 5 ტერორისტი მოკლეს. თავდამსხმელთა ნაწილი შაჰიდის ქამრებს ატარებდა. დაშავებულია 6 ადამიანი, რომელთაგან ერთი პოლიციელია.
Reuters-ის ინფორმაციით, ესპანეთის პოლიცია აცხადებს, რომ ბარსელონასა და კამბრილსის ტერორისტულ თავდასხმებში ეჭვმიტანილი სამი პირია დაკავებული.
ესპანეთის პრემიერ-მინისტრმა, მარიანო რახოიმ ქვეყანაში სამდღიანი გლოვა გამოაცხადა.