მე - აქტიური მოქალაქე - პანკისელი ახალგაზრდებისთვის ახალი პროექტი დაიწყო. საქართველოს პარლამენტის ეროვნული ბიბლიოთეკისა და არასამთავრობო ორგანიზაცია დემოკრატიის ლაბორატორიის წარმომადგენლები პანკისის ხეობის საჯარო სკოლებს სტუმრობენ და სკოლების ბიბლიოთეკებს თანამედროვე ლიტერატურით ანახლებენ. პროექტმა სტარტი დუისის სკოლიდან აიღო, სკოლის მოსწავლეებთან და მასწავლებლებთან გაიმართა დისკუსია ხეობაში არსებულს გამოწვევებსა და საჭიროებებზე. იმსჯელეს ახალგაზრდების კულტურულ, სოციალურ და სამოქალაქო აქტივობებში ჩართვის მნიშვნელობაზე.
პროექტის ფარგლებში დემოკრატიის ლაბორატორია სხვადასხვა სტუმართან ერთად პანკისის ხეობაში არსებულ ყველა სკოლას ეწვევა.
“მე, აქტიური მოქალაქე” საქართველოს პარლამენტის ეროვნულ ბიბლიოთეკასთან თანამშრომლობითა და ბავშვთა და ახალგაზრდობის განვითარების ფონდის ფინანსური მხარდაჭერით ტარდება. მისი მიზანია პანკისის ხეობაში მცხოვრები ახალგაზრდებისთვის განათლების გაუმჯობესების ხელშეწყობა, სამოქალაქო ცნობიერების ამაღლება, ღია დისკუსიების წახალისება და მოტივაციის გაზრდა სამომავლო უნარ-ჩვევების გამომუშავების მიზნით.
