ბორჯომის ხეობაში ხანძრის შედეგად 12 ჰექტარზე მეტია დამწვარი. ამის შესახებ ეროვნული სატყეო სააგენტოს უფროსმა თორნიკე გვაზავამ განაცხადა. მისი თქმით, ძლიერი ქარის გამო ხანძრის ახალი კერები ჩნდება, რის ლოკალიზებასაც ახერხებენ.
გვაზავას თქმით, ადგილზე მუშაობს 300 მეხანძრე, დაახლოებით 100 მეტყევე და მოხალისეები. ასევე ხანძრის ჩასაქრობად სამი ვერტმფრენი მუშაობს, რომელთაგან ერთი აზერბაიჯანულია. გვაზავას თქმით, ელოდებიან თურქეთიდან დახმარებას 2 ვერტმფრენის სახით, რომელიც შუადღისთვის იქნება ადგილზე.
„შექმნილია პრემიერის ხელმძღვანელობით საგანგებო შტაბი. მთელი ღამის განმავლობაში მიმდინარეობდა მუშაობა. გაკეთდა გზები, შევიყვანეთ ტექნიკა და ყველანაირი გზით ვებრძვით სტიქიას. მე ვფიქრობ, 12 ჰექტარზე მეტია დამწვარი “, - განაცხადა ეროვნული სატყეო სააგენტოს ხელმძღვანელმა.
ბორჯომის ხეობაში, წაღვერის ტყეში ხანძარი 20 აგვისტოს შუადღისას გაჩნდა. 21 აგვისტოს შუადღისთვის, მეხანძრე-მაშველებმა ცეცხლის ლოკალიზება შეძლეს. რა დროსაც, სავარაუდოდ, დამწვარი იყო 5 ჰა. თუმცა 21-ში საღამოს ძლიერი ქარის გამო გაჩნდა ცეცხლის ახალი კერები.
ფოტო: თინათინ კიღურაძე