შს მინისტრმა, გიორგი მღებრიშვილმა ჟურნალისტებს სტიქიის ზონაში არსებული ვითარების შესახებ ინფორმაცია მიაწოდა. მისი თქმით, სხვა დღეებთან შედარებით ქარი ძლიერია, მაგრამ ამის მიუხედავად, სამუშაოები არ ჩერდება.
მინისტრის ინფორმაციით, ამ ეტაპზე ხანძრის მხოლოდ ერთი ახალი კერაა და იქ უკვე იმყოფებიან შსს-ს თანამშრომლები.
"ხედავთ რომ ქარია, ასეთი ქარი არ ყოფილა არც გუშინ და არც გუშინწინ, რაც უფრო ზემოთ მიდიან ჩვენი თანამშრომლები, მით უფრო ძლიერდება ქარი, მაგრამ კიდევ ერთხელ გიმეორებთ, ჩვენ არ ვაჩერებთ ერთი წამით მუშაობას და შედეგს აუცილებლად მივიღებთ. ახალი კერები ამ ეტაპზე არ გვაქვს, გარდა ერთი გამონაკლისისა, მაგრამ იქაც უკვე გაჭრილია გზა, მისული არიან ჩვენი თანამშრომლები", - თქვა შს მინისტრმა.
მღებრიშვილმა აღნიშნა, რომ ხანძრის გაჩენასთან დაკავშირებით გამოძიება დაწყებულია და გამოძიება მუშაობს ყველა ვერსიაზე, მათ შორის დივერსიაზე.
გიორგი მღებრიშვილი არ ადასტურებს გავრცელებულ ინფორმაციას, რომ თითქოს ყველა დამსვენებელს ამოწმებენ. თუმცა, მისი თქმით, ის ვინც ინტერესის ობიექტია, მასთან მიმდინარეობს საგამოძიებო მოქმედებები.