საქართველოს რკინიგზის შენობასთან მოშიმშილე რკინიგზელების სოლდარობის აქცია მიმდინარეობს.
„ლიბერალის" კორესპონტენტის ცნობით, აქციის მონაწილეები საქართველოს რკინიგზის შენობაში შესვლას ცდილობენ, რადგან რკინიგზის ადმინისტრაცია მათ მოთხოვნებზე პასუხს არ სცემს. პოლიცია მათ შენობაში შესვლის უფლებას არ აძლევს.
აქციის მონაწილეებსა და პოლიციას შორის შეხლა-შემოხლა მოხდა. პოლიცია მათ დაკავებას ცდილობს. ადგილზე მივიდა სასწრაფო დახმარება. 2 მოშიმშილე რკინიგზელი ცუდად გახდა.
15 აგვისტოს საქართველოს რკინიგზის თანამშრომლებმა შიმშილობის აქცია დაიწყეს. მათი თქმით, სამუშაო ადგილი და პირობები ადმინისტრაციამ შეთანხმების გარეშე შეუცვალათ.
ამჟამად შიმშილობს 8 ადამიანი, მათ შორის არიან რკინიგზელთა ახალი პროფკავშირის წარმომადგენლები. მათი მოთხოვნებია: დაუყოვნებლივ დაბრუნდნენ გათავისუფლებული თანამშრომლები სამსახურში; რკინიგზა დატოვონ საქართველოს რკინიგზის საზოგადოებასთან ურთიერთობის სამსახურის უფროსმა დაჩი ცაგურიამ და ინფრასტრუქტურის სამსახურის უფროსმა ვასილ ხორავამ; შესრულდეს წინა გაფიცვების შედეგად მიღწეული შეთანხმებები.
