ფონდი „ღია საზოგადოება - საქართველო“ სპეციალურ განცხადებას ავრცელებს, რომელშიც ნათქვამია, რომ სიმართლეს არ შეესაბამება ინფორმაცია ე.წ სოროსის ფონდების დახურვასთან დაკავშირებით ისრაელში, უნგრეთსა და მაკედონიაში. „ღია საზოგადოება - საქართველოს“ განცხადებით, ფონდს არასოდეს ჰქონია ოფისი ისრაელში.
„ღია საზოგადოების ფონდების ერთერთი სათავო ოფისი არის უნგრეთში, კერძოდ ბუდაპეშტში. უნგრეთის ხელისუფლების მხრიდან იყო მცდელობა, რომ დახურულიყო ცენტრალური ევროპის უნივერსიტეტი, თუმცა ამას საზოგადოების მწვავე რეაქცია და გამოსვლები მოჰყვა. შედეგად, უნივერსიტეტი დღესაც ფუნქციონირებს.
შეუფერხებლად აგრძელებს მუშაობას ღია საზოგადოების ფონდი მაკედონიაში და განაგრძობს ისეთი ინიციატივების დაფინანსებას, რომელიც ხელს უწყობს სამოქალაქო საზოგადოების გაძლიერებას და ქვეყნის ინტეგრაციას ევროპაში“, - წერია განცხადებაში.
„ქართველთა მარშის“ წარმომადგენლები დღევანდელ აქციაზე „ღია საზოგადოება - საქართველოს“ დახურვას მოითხოვდნენ. აქციის ორგანიზატორებმა განცხადეს, რომ ისრაელში უნგრეთსა და მაკედონიაში „ღია საზოგადოების“ ოფისები დახურეს.