„სანამ არ განახევრდა ეს პარტია და არ შეივსო ახალი ხალხით, არ მოხერხდა, შეუძლებელი იყო სამოქალაქო კონტრაქტზე საუბარი“ - ამის შესახებ „რესპუბლიკური პარტიის“ წევრმა, დავით ბერძენიშვილმა ლგბტ წყვილებისთვის სამოქალაქო პარტნიორობის ინიციატივაზე საუბრის დროს განაცხადა.
მისი თქმით, „რესპუბლიკური პარტია“ არჩევნების წინ „სახიფათო და არაპოპულარული თემებით“ გამოდის, რაც არის ინვესტიცია საქართველოს ევროპულ მომავალში, განვითარებასა და პროგრესში.
„გუშინ წავიკითხე, ერთ ადამიანს დაუწერია „რესპუბლიკური პარტია“ იმ ღირებულებებს უბრუნდება, რისთვისაც მე მათ ამომრჩეველი ვიყავი და მეც ვუბრუნდები „რესპუბლიკურ პარტიასო“. მეც ვუბრუნდები „რესპუბლიკურ პარტიას“ იმ იძულებითი პაუზის შემდეგ, როცა პარტია სხვათა ინტერესების გათვალისწინებას უფრო დიდ ყურადღებას უთმობდა, ვიდრე პროგრესზე მუშაობას“ - თქვა ბერძენიშვილმა.
„რესპუბლიკელები“ ლგბტ ადამიანებისთვის სამოქალაქო პარტნიორობის შემოღების ინიციატივით გამოდიან
„რესპუბლიკურმა პარტიამ“ დღეს ორი პოლიტიკის დოკუმენტის პრეზენტაცია გამართა - „ორდონიანი თვითმმართველობა - მმართველობის დეცენტრალიზაციისთის“ და „სამოქალაქო კონტრაქტი პარტნიორობის შესახებ“.
ორდონიანი თვითმმართველობა - „რესპუბლიკურმა პარტიამ“ პოლიტიკის დოკუმენტი წარადგინა
პარტიის თავმჯდომარემ, ხათუნა სამნიძემ გერმანელი „თავისუფალი დემოკრატების“ გამოცდილებაზე ისაუბრა და აღნიშნა, რომ მათი მაგალითი არის მაჩვენებელი, „თუ რამდენად მნიშვნელოვანია, როცა პარტია თავისი ღირებულებების, პრინციპების ერთგულია“.
„ისინი მსგავს სიტუაციაში იყვნენ საპარლამენტო არჩევნების შემდეგ, როგორც დღეს ვართ ჩვენ, „რესპუბლიკელები". ისინი დარჩნენ პარლამენტის გარეთ, დაკარგეს ადგილობრივ თვითმმართველობაში პოზიციები. პარალელის გავლება შეიძლება იმ თვალსაზრისით, რომ კოალიციურ მთავრობაში ყოფნის დროს მათაც დაივიწყეს მთავარი, ლიბერალური ღრებულებები და პრინციპულობა.
არ იყო ჩვენი კამპანია ლიბერალური და პრინციპული, გამბედავი, როგორც ახასიათებს „რეპუბლიკურ პარტიას“, რისთვისაც შეიქმნა იგი. ჩვენ ეს ყველაფერი გავიაზრეთ, შევისწავლეთ და „დემოკრატების" პოზიციებმა გერმანიაში კიდევ ერთხელ დაგვარწმუნა, რამდენად მნიშვნელოვანია, ამომრჩეველს გულწრფელად ველაპარაკოთ. „რესპუბლიკური პარტია“ მზად არის, ამ არჩევნებზე თავის ამომრჩეველს ელაპარაკოს ღიად, გულწრფელად იყოს გამბედავი თავის პოზიციებში, იყოს მომავალზე ორიენტირებული“ - თქვა სამნიძემ.
