საქართველოს მთავრობის გადაწყვეტილებით, ყვარლის მუნიციპალიტეტში, სოფელ შილდაში მდებარე კულტურული მემკვიდრეობის უძრავ ძეგლებს - „ცეცხლის ტაძარსა“ და „ჭაბუკაურის სატაძრო კომპლექსს“ ეროვნული მნიშვნელობის კატეგორია განესაზღვრა.
ნეკრესის ნაქალაქარის „ცეცხლის ტაძარი” 1984-1993 წლებში ს. ჯანაშიას სახელობის საქართველოს სახელმწიფო მუზეუმის არქეოლოგიური ექსპედიციის გათხრების შედეგად აღმოაჩინეს. ტაძარი ჩვ. წ. IV ს-ში არის დანგრეული. ძეგლის არქეოლოგიური გათხრისას მოპოვებული ნივთიერი მასალის ანალიზიდან გამომდინარე, მეცნიერთა ნაწილის აზრით, აღნიშნული უძველესი ნაგებობა მაზდეანური სარწმუნოების მიმდევარი საზოგადოების სამლოცველოს, ე.წ. „ცეცხლის ტაძარს“ წარმოადგენს.
„ჭაბუკაურის სატაძრო კომპლექსის“ ბაზილიკა საქართველოს ტერიტორიაზე ერთ-ერთი უადრესი სამნავიანი ტაძარი , რომელიც ქართლის სამეფოში ქრისტიანობის სახელმწიფო რელიგიად გამოცხადების პირველივე პერიოდში აშენდა.
