საქართველო 75 ქვეყნისგან შემდგარი ორგანიზაციის - „ღია მმართველობის პარტნიორობის" (OGP) თავმჯდომარე გახდა. გიორგი კვირიკაშვილმა საფრანგეთის პრეზიდენტ ემანუელ მაკრონისგან თავმჯდომარეობა ერთი წლით გადაიბარა. როგორც პრემიერმა განაცხადა, OGP-ის თავმჯდომარეობა საქართველოს მთავრობისთვის საამაყოა.
„ჩემთვის უდიდესი პატივი და პრივილეგიაა, რომ ამ მნიშვნელოვანი ღონისძიების მასპინძლებს შორის ვარ და გამჭვირვალობისა და დემოკრატიის უდიდესი გავლენის მქონე გლობალური მოძრაობის ახლად არჩეული თავმჯდომარის სახით მოგმართავთ. ამ პროცესში ჩვენ ბევრ თქვენგანთან ვითანამშრომლეთ. ჩვენ გავიზიარეთ თქვენი საუკეთესო გამოცდილება და დაინტერესებულ პირებთან ერთად ჩვენი წარმატების ისტორიებიც განვიხილეთ. აღმაფრთოვანებს ის წარმატება, რომელსაც OGP-ის წევრი ქვეყნები მსოფლიოს გარშემო აღწევენ - აღმაფრთოვანებს მოსახლეობის მზაობა, გააკონტროლოს ხელისუფლება. მიუხედავად ამისა, ჩვენ კიდევ ბევრი გაკვეთილის სწავლა მოგვიხდება - არა მხოლოდ ერთმანეთის ან სამოქალაქო საზოგადოების ორგანიზაციებისგან, არამედ ჟურნალისტების, მეწარმეებისა და კარგი მმართველობის სფეროში არსებული სხვა ლიდერებისგან", - განაცხადა პრემიერმა.
პრემიერმა აღნიშნა, რომ საქართველოს მთავრობის ურყევი გადაწყვეტილებაა ოთხი მიზნის მიღწევა თანამშრომლობისა და მოქალაქეთა ჩართულობის უზრუნველყოფა; გამჭვირვალობისა და კორუფციის წინააღმდეგ ბრძოლის ხელშეწყობა; საჯარო მომსახურების მიწოდებაში ინოვაციების ხელშეწყობა; OGP-ის წევრ ქვეყნებს შორის პარტნიორობის გააქტიურება.
პრემიერმა მადლობა გადაუხადა ყველა ქვეყანას ამ ნდობისთვის და პარტნიორობის თავმჯდომარედ არჩევისთვის.