დღეს თბილისის საქალაქო სასამართლომ 24 აგვისტოს რკინიგზის დაპარტამენტთან გამართულ აქციაზე დაკავებულ პირებთან დაკავშირებით გადაწყვეტილება მიიღო.
აქციაზე სულ 10 პირი დააკავეს. მათ ადმინისტრაციულ სამართალდარღვევათა კოდექსის 166-ე და 173-ე მუხლების დარღვევას ედავებოდნენ, რაც წვრილმან ხულიგნობასა და პოლიციელის კანონიერ მოთხოვნაზე დაუმორჩილებლობას ითვალისწინებს.
სასამართლოს გადაწყვეტილებით, 100 ლარით დაჯარიმდნენ (166-ე მუხლი) ირაკლი კუპრაძე და გიორგი დიასამიძე. სასამართლომ დაადგინა, რომ 173-ე მუხლით ადმინისტრაციული გადაცდომა არ ყოფილა.
სასამართლოს გადაწყვეტილებით, 300 ლარით დაჯარიმდა ცოტნე ცხვედიანი, 400 ლარით - გიორგი ჯოხაძე.
დანარჩენი ექვსი მონაწილის მიმართ კი - ილია ლეჟავა, პაატა ნინუა, შალვა ადუაშვილი, გიორგი სოფრომაძე, გოჩა სურგულაძე, გიორგი ზაქაიძე, - სასამართლომ ადმინისტრაციული გადაცდომა არ დაადგინა და შეწყვიტა ადმინისტრაციული საქმის წარმოება.
„არცერთი ადამიანის მიმართ არ იკვეთებოდა დარღვევა და შესაბამისად ყველას მიმართ უნდა შეწყვეტილიყო საქმის წარმოება. ჩვენ რა თქმა უნდა იმ ადამიანებთან მიმართებაში ვისაც დაუდგინდა დარღვევა, გადაწყვეტილებას აუცილებლად გავასაჩივრებთ სააპელაციო სასამართლოში. იმისთვის რომ უზრუნველყოფილი იყოს გამოხატვის თავისუფლება, შეკრების თავისუფლება, აუცილებელია რომ მიეცეთ ამ უფლების განხორციელების საშუალება, არ შეეშალოთ ხელი ამ უფლების განხორციელებაში. ამ კონკრეტულ შემთხვევაში მიგვაჩნია, რომ ჩარევა, რაც განხორციელდა იყო გადაჭარბებული ძალის გამოყენება. ზოგიერთ შემთხვევას სასამართლომ დაადგინა გადაწყვეტილება რომელიც მისაღები იყო და პასუხობდა საერთაშორისო სტანდარტებს, თუმცა ამავე გადაწყვეტილებით იგივე დემონსტარციის მონაწილეების მიმართ სხვაგვარად გადაწყვიტა, ამ ნაწილში რა თქმა უნდა არ ვეთანხმებით და გავასაჩივრებთ“,- უთხრა „ლიბერალს“ ადვოკატმა თამარ გაბისონიამ.