დღეს საქართველოს პარლამენტმა გენერალური აუდიტორის თანამდებობაზე ირაკლი მექვაბიშვილი აირჩია.
პარლამენტის თავმჯდომარე ირაკლი კობახიძემ დეპუტატებს ირაკლი მექვაბიშვილის ბიოგრაფია გააცნო და აღნიშნა, რომ წარდგენილ კანდიდატს საფინანსო ინსტიტუტებში მუშაობის დიდი გამოცდილება აქვს - მათ შორის, ეროვნულ ბანკსა და ევროპის რეკონსტრუქციისა და განვითარების ბანკში.
„ბატონ ირაკლი მექვაბიშვილს აქვს ძალიან მდიდარი ბიოგრაფია. მას აქვს საფინანსო ინსტიტუტებში, მათ შორის, როგორც კერძო, ასევე საჯარო სექტორში მუშაობის მრავალწლიანი გამოცდილება, ისევე, როგორც საერთაშორისო ორგანიზაციებში. ბატონი ირაკლი წლების განმავლობაში გახლდათ ეროვნული ბანკის მაღალი რანგის თანამშრომელი. წლების განმავლობაში მას ეკავა მაღალი პოზიციები კერძო სექტორში და დღემდე, მას ეკავა მაღალი თანამდებობა ევროპის რეკონსტრუქციისა და განვითარების ბანკში. ის გახლდათ ევროპის რეკონსტრუქციისა და განვითარების ბანკის ასოცირებული დირექტორი და მთავარი ბანკირი.“, - განაცხადა ირაკლი კობახიძემ.
კანონმდებლობის თანახმად, გენერალურ აუდიტორს 5 წლის ვადით პარლამენტის სიითი შემადგენლობის უმრავლესობა ირჩევს.
პლენარულ სხდომაზე გამართული კენჭისყრის შედეგად, საქართველოს პარლამენტმა გენერალური აუდიტორის თანამდებობაზე ირაკლი მექვაბიშვილი 80 ხმით აირჩია.
