თბილისში, ზემო ფონიჭალის 206-ე საბავშვო ბაღის მეორე სართულიდან ბავშვი გადმოვარდა. როგორც „რუსთავი 2-თან" საუბარში თბილისის ბაგა-ბაღების მართვის სააგენტოს დირექტორმა თემურ თორდინავამ განაცხადა, ბავშვის ჯანმრთელობის მდგომარეობა სტაბილურია, თუმცა რთულია. თორდინავას თქმით, მცირეწლოვანის სიცოცხლეს საფრთხე არ ემუქრება.
„ეს ფაქტი არ უნდა მომხდარიყო, მაგრამ ჩემი აზრით, ალბათ გაეპარათ ბავშვი და საძინებლიდან გადახტა, ანუ მეორე სართულიდან, ჩვენი აღსაზრდელი,“ - განაცხადა თემურ თორდინავამ.
თორდინავა არ გამორიცხავს, რომ იმ პირის პასუხისმგებლობის საკითხი დადგეს, რომელსაც ბავშის მეთვალყურეობა ევალებოდა. ამ დროისთვის მიმდინარეობს გამომწვევი მიზეზების დასადგენად მოკვლევა. თორდინავას განცხადებით, მონიტორინგის წარმომადგენლები ბაღში უკვე მივიდნენ.
თბილისის ბაგა-ბაღების მართვის სააგენტოს დირექტორი აღნიშნავს, რომ მონიტორინგის პასუხი დაახლოებით, ორ საათში იქნება ცნობილი და მისი თქმით, ამის შემდეგ „უმკაცრეს ზომებს“ მიიღებს.
